NAGSUWAT si kanhi gobernador Emilio “Lito” Osmeña kang Presidente Benigno Aquino III ug nagpahinumdom niini sa naangkon nga atonomiya sa Mactan Cebu International Airport Authority niadtong 1990.

Iyang gisaway ang nahitabo nga kasabotan sa MCIAA ug Department of Transportation and Communication tali sa GMR-Megawide Cebu Airport Corp. sa pagpalambo sa tugpahanan.

Sa usa ka pahina nga suwat ni Osmeña sa presidente, siya namahayag nga way kasigurohan ang kantidad nga bayad sa GMCAC sa pagpalambo sa MCIA nga igasto dinhi sa Sugbo.

Ang iyang gipasabot mao ang P14.4 bilyones nga bayad sa pribadong kompaniya sa proyekto, sa pagpalambo sa passenger terminal nga gisugdan na og trabaho ug gipaabot mabuksan sa publiko sa 2018.

“Hinaot dili tinuod ang mga honghong nga kini usa lang sa mga pamaagi sa pagpangwarta sa Partido Liberal para karong umaabot nga piniliay,” nagkanayon si Osmeña sa iyang suwat kang Aquino.

Siya nipahinumdom sa presidente nga dihang buhi pa ang inahan niini ug mao pa ang naglingkod nga presidente sa nasod, mipirma kini sa Republic Act 6958 (MCIAA Charter) niadtong Hulyo 31, 1990.

Ang balaod maoy naghatag og atonomiya sa MCIAA.

Ang isyu sa MCIA ang “bombshell” nga buot ni­ya nga pabuthon batok sa Liberal Party diin sakop si Gobernador Hilario Davide III.

Matod niya tungod sa kadako sa kantidad mahimo na solusyon sa mga suliran sa infrastructure nga gikinahanglan sa mga Sugboanon pagsulbad sa baha ug trapiko.

Si Osmeña nisaway sa giingong pagkadiktador sa nasudnong kagamhanan nga wa hatagi og kagawasan ug kalamboan ang Sugbo.

Matod niya ang iyang pangandoy pagpalambo sa Sugbo pinaagi sa mga proyekto niya nga imprastruktura ang usa sa mga nakapaaghat niya nga modagan og balik pagka gobernador sa umaabot nga piniliay.

“Para wa nay trapik ug lunop ang Sugbo. Also, I want to run again to rectify my mistakes for supporting people that are not performing like Gwen Garcia and Junjun Davide,” dugang niya.

Alang niya way nahimong mga proyekto ang kasamtangan nga gobernador nga nag-agad lang sa mando sa ulohang kagamhanan.

“Si Davide nagpaitoy-itoy sa mga Tagalog... It seems to me, he doesn’t know how to be a governor,” nagkanayon si Osmeña.

Si Davide sa iyang bahin wa na mahibung sa mga pamahayag ni Osmeña kay nagsingabot na ang eleksyon.