GIKATAHO sa ESPN nga si four-time MVP LeBron James maoy nagpagawas og impormasyon sa media kabahin sa hangyo ni Kyrie Irving sa management sa Cleveland Cavaliers nga magpa-trade kini sa laing team.
Nagkanayon si ESPN commentator Stephen Smith nga mao kini ang pagtuo sa iyang mga tinubdan.
“According to my sources, they believe LeBron James had everything to do with news getting out that Kyrie Irving wants to be traded because Kyrie Irving and his representation and others met with the Cavaliers a couple weeks ago and not a word got out until recently,” pasabot ni Smith sa SB Nation.
“They believe that LeBron James got word of it and was put off by it and leaked it. I’m not going to accuse LeBron of such a thing. I don’t know that to be true at all. But I know that’s what Kyrie Irving believes.”
Hinuon gitataw ni Smith nga ang kining tanan pulos pa lang panahom ug ang klaro lang ning puntoha mao ang tinguha ni Irving nga makigbuwag kang James ug Cavaliers.
Human sa tulo ka sunodsunod nilang biyahe sa finals sa National Basketball Asscociation (NBA) nga gibuwakan sa nag-inusara nilang titulo niadtong 2016, ang Cavaliers daw paingon nang mawad-an og usa sa labing lig-on nilang haligi.
Ning maong lakang, mabasa nga dili na gusto si Irving nga magpahipi kanunay sa anino ni James ug gusto kining mangita og gingharian diin siya maoy hari.
Giangkon ni Irving nga daghan siyang nakat-unan kang James sa ilang panag-uban sulod sa tulo ka mga tuig apan gusto niyang moduwa nga siya ang labing sinaligan nga mao unta’y iyang nalantawan dihang mipirma siya og lima ka mga tuig nga contract extension sa wala pa nakadesisyon si James nga mobalik sa Cavaliers. (ESL)