Malinawon ang protesta batok SONA sa Sugbo

MITUG-AN ang hepe sa kapulisan sa Central Visayas nga taas ang morale sa kapulisan lukop nasud sanglit natuman ang saad ni Presidente Rodrigo Duterte sa unang State of the Nation Address (SONA) niini nga patas-an ang sweldo sa mga pulis.

Sa unang SONA ni Duterte sa miaging tuig gisaad niini nga patas-an ang sweldo sa tanang pulisa ug kasundalohan.

Si P/CSupt. Jose Mario Espino, hepe sa Police Regional Office (PRO) 7, mitug-an nga ila na kining nadawat karon gani usa ni sa hinungdan nga misaka ang ilang morale.

Dako usab matod pa kini og ika­tabang sa ilang kampanya ba­tok sa ilegal nga drugas diin ma­dasigon ang kapulisan nga mo­patuman niini tungod sa suporta nga gihatag sa ilang labaw nga mao ang presidente sa nasud.

“Kaya nga tumaas ang morale ng PNP dahil tumaas ang aming sahod,” matod ni Espino.

Apan iyang giangkon nga bisan pa man sa kataas na sa sweldo sa mga pulis nga duna pa gihapoy wa makontento niini ug nalambigit pa gihapon sa ilegal nga drugas.

Mibahad niini si Espino nga hangtod karon nagpadayon sa ilegal nga kalihukan nga unda­ngon na kini sama sa kurap­syon, hulidap, extortion ug uban pa.

“Kaya nung pag-assume ko dito sinabi ko na ayaw ko ng mga police na nasangkot sa hulidap, extortion planting of evidence at mismo si Presidente Duterte ayaw nya, sinabi pa nga nya na stop it,” padayag ni Espino.

Gihulagway usab sa PRO 7 nga malinawon ra sa kinatibuk-an ang gihimong rally sa mga militanteng pundok kagahapon sa udto.

Matod ni Espino nga wa ra makahasol ang mga raliyesta sanglit nasabutan na kini nila nga di mohimog kasamok.

Bisan pa man niini giandam gihapon sa PRO 7 ang kapin sa 100 ka mga sakop sa Crowd Dispersal Management team diin kasagaran niini mga babaye. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph