KATAW-ANAN kining mga raliyesta nga nag-rally atol sa gihimo nga ika-duhang State of the Nation (SONA) ni President Rody Roa Duterte (PRRD). Imperyalismo, pagsupak sa tawhanong katungod og uban pa nga batikos sa kagamhanan. Kataw-anan kay balik-balik na lang kining ilang gihimo. Balik-balik sab kining ilang mga gipangyawyaw. Kon imong paminawon ang sinultian sa ilang lider nga si Renato Reyes, sama sa naminaw ka sa sinultian sa usa ka tawo nga wala magpuyo niining kalibotana. Gusto nila kini, gusto nila kana, apan dunay dakong kulang sa ilang gibuhat – dili sila mosulti og unsaon paghimo ang ilang gustong mahitabo. Kontento ra sila nga mo-atake apan dili sila ganahan mohatag og kasayoran unsaon paghimo sa ilang gustong mahitabo. Mao seguro kini ang hinungdan nga balik-balikon lang nila ang ilang gihimo kada tuig. Duna seguroy dakong negosyo kining rally-rally?
u2022 • •
Makita gyod nimo ang natural nga kinaiya ni PRRD samtang siya nagbasa sa iyang mensahe sa “teleprompter.” Gusto niya ang iyang kinaugalingon nga diskurso, di siya moangay nga mosunod lang sa gihimo sa uban, sama sa pagbasa sa hinimo na daan nga diskurso. Mogawas ang iyang natural nga kinaiya nga binugoy nga sinultian, apil na ang mga pamalikas. Gani, gisugdan niya ang SONA sa usa ka kataw-anan nga storya. Kon basehan sa mga nangaging SONA sa mga nangaging president, dili pormal paminawon ang SONA ni PRRD sa imaging Lunes. Daghan og adlib og mga pamalikas. Apan kon basehan sa naandan nga pamaagi ni PRRD, dili na matingala ang mga tawo kon buhaton kini niya. Naanad na ang mga tawo sa kinaiya ni PRRD. Mao kini ang pamaagi sa usa ka tawo nga naandan na sa mga kabos sa karsada.
u2022 • •
Nindot ang adlib ni PRRD bahin sa kampanya sa druga. Way undang ang kampanya sa druga bisan pa man sa batikos kaniya sulod ug gawas sa Pilipinas. Mas nindot pa unta kon human sa SONA sa dihang giatubang ni PRRD ang mga miyembro sa media kon gisulti niya ang iyang plano bahin sa kampanya sa druga, labi na gyod ang paghingalan sa mga nalista sa presidente nga naapil sa maong krimen. Daghan ang naghinamhinam nga hinganlan sa presidente ang naapil sa lista. Subo lang paminawon kay way nangutana kang PRRD bahin sa druga sa maong presscon.
u2022 • •
Nindot sab ang iyang gisulti bahin sa kampanya kontra sa mga minahan sa nasod. Gusbat na kaayo ang daghang mga kabukiran ug kapatagan tungod sa way hunong nga pagmina og pagpasagad sa kinaiyahan. Sama sa way pagpakabana ang gihimo sa uban mao nga angayan unta undangon na kini. Gani, mas nindot unta kon duna pay usa ka opisyal sa DENR nga andam mobarog batok sa gubat sa pagkagusbat sa kinaiyahan, sama sa gihimo ni kanhi DENR Secretary Gina Lopez.
u2022 • •
Nindot sab ang gisulti ni PRRD bahin sa bag-ong kamandoan sa procurements law. Dili na kaayo maglisod ang mga opisinahan sa gobierno sa pagpamalit og mga himan sa pagpatuman sa mga proyekto panahon sa bidding. Tungod sa kalisod sa pag-proseso sa mga papeles, madugay ang transaksiyon og madugay sab ang pagbayad sa mga supplier bisan kon na-deliver na ang mga himan. Kasagaran nga mahitabo, dili na ganahan mo deliver pa ang mga supplier kay dugay man mabayaran sa gobierno. Mao kini hinungdan nga wa nay moapil sa bidding kay mabugnaw sa pamaagi sa gobierno. Kon way moapil, maglisod ang pagpamalit sa himan kay ipaagi man gyod sa bidding ang pagpamalit. Maayo na lang ang gibuhat sa presidente nga usbon gamay ang pamaagi aron dili na kaayo maglisod ang pagpamalit sa mga himan nga dili usab makalapas sa balaod.
u2022 • •
Nindot unta kon gihisgotan pa ni PRRD ang bahin sa plano niya sa federalism og ingon man ang bahin sa mahitabo karong Oktobre kalabot sa barangay elections. Madayon ba o dili ang piniliay sa barangay? Kanus-a man sugdi ni PRRD ang kampanya bahin sa federalism?
u2022 • •
Busy na kaayo ang ubang mga politiko sa ilang pagpangandam sa kampanya sa federalism. Ang uban, naglista na gani sa ilang mga linya sa mga opisyales sa barangay kay nagtuo sila nga dunay koneksiyon ang kampanya sa federalism og ang pagtudlo sa mga OICs sa barangay. Daghan ang nagtuo nga kadtong ipatawag sa kampanya sa federalism mao ra sab ang tawagon para sa himoon nga mga lista sa OIC sa barangay. Husto kaha sila?