MOABOT sa 14 ka mga banyera sa isdang tuloy ang gisakmit sa Provincial Anti-Illegal Fishing Task Force (CPAIFTF) human masuta sa ilang market denial operation nga mga pinabuthan diay.
Pasado alas 9 sa buntag niadtong Martes sa Barangay Magay, Compostela nahitabo ang market denial operation.
Ang matag banyera sa isda nga giingong gikan pa sa lungsod sa Medellin, gitumbok sa task force nga dunay 50-60 ka kilo sa isda.
Ang tanang nasakmit nga isda mobalor og P60,000.
Matod ni CPAIFTF operations head, Lyndon Ruiz, positibo nga pinabuthan ang maong mga isda human masuta sa fish examiner nga duna kini nitrates ug nagusbat sab ang external organs niini.
Sigun ni Ruiz, inay nga gabii o kaadlawon nga maoy naandan nga schedule sa pagbiyahe sa mga isda nga itumod sa mga merkado sa siyudadsa Sugbo, giusab na kini sa mga fish dealer human mabantayi nga init ang ilang operasyon labot niini.
Gipasakaan na og reklamo ngadto sa Fisheries and Aquatic Resources Adjudication Board ang truck driver nga si Veronico Rivera ug helper nga si Rodney Paraiso, tungod sa kalapasan sa Provincial Fisheries Code.
Giingong gikan sa lungsod sa Medellin ang kargamento nga ilang dala.
Nahimangod si Ruiz kay di palang dugay, nihimo sila og kampaniya sa maong lugar pag-undang na sa illegal nga paagi sa pagpanagat.
Ang Kapitolyo nanghingusog sa kampanya batok sa ilegal nga pagpanagat, lakip na sa pagpamaligya sa mga pinabuthang isda.
Bisan pa sa hugot nga kampanya, duna gihapoy mga isda nga ilegal ang pagkuha nga nakalusot sa kamerkaduhan sa Sugbo. (AZDL)