MOABOT lang sa 18 ka mga Transport Network Vehicle Services (TNVS) ang na-renew ang mga provisional authority (PA) sa Land Transportation Franchising and Regulatory Board sa Central Visayas.
Si Reynaldo Elnar, acting regional director sa LTFRB 7, nibutyag nga karon lang Hulyo na-renew ang PA sa maong units.
Matod niini, nga sa kapin 100 ka TNVS nga naisyuhan ug ni-expire ang mga PA, 18 pa lang ang na-renew.
Si Elnar nipahibawo niini human ang ilang ulohang buhatan nimando sa transport network companies (TNC), Grab ug Uber, nga i-deactivate ang ilang mga drayber nga na-accredited sa ilang platforms sugod Hulyo 1, 2017.
Kini human ang app-based ride-sharing companies, Grab ug Uber, nisang-at sa ilang motions for reconsideration (MR) sa miaging semana nga naghangyo sa LTFRB nga dili una ipatuman ang pagpanakop batok sa 'colorum' nga mga TNVS sugod niadtong Miyerkules.
Ang LTFRB namahayag nga gipugngan una ang pagpatuman sa mga kamandoan nga nalatid sa Consolidated Order pinetsahan og Hulyo 11, 2017 alang lang sa mga TNVS nga naa sa ilang mga sistema hangtod sa Hunyo 30, 2017.
Kini nagpasabot nga gidili ang pagdawat og dugang accreditation sa TNVS o pag-activate sa ilang accounts sa tagsatagsa ka mga sistema nga ipatuman dayon.
Ang board nipasidaan manubag ang mapakyas pagtuman niini.
Si Brian Cu, Grab Philippines Country head, nipaklaro nga ang pagpa-deactivate sa LTFRB sa ilang partner-drivers nga na-accredit sa ilang platforms human sa Hunyo 30, wala magpasabot nga dakpon na kini kon masakpan mobiyahe.
Si Leo Emmanuel Gonzales, public affairs manager sa Grab, namahayag nga pabiling epektibo ang kamandoan sa LTFRB ingon man ang ilang giduso nga MR.
"Any enforcement is held off in abeyance while dinideliberate ng Board (LTFRB) ang final decision," pahayag ni Gonzales sa Facebook live ni Cu niadtong Miyerkules sa gabii.
Si John Paul Nabua, manlalaban sa Grab, nipasabot nga way mahitabo nga dakop sanglit wala pay pinal nga desisyon ang LTFRB.
Niadtong MIyerkules sa gabii, nagtigom ang mga opisyal sa LTFRB ug TNC nga nilungtad og unom ka oras.
Si Cu nibutyag nga upat ka mga butang ang gipangayo sa LTFRB.
Una, ang listahan sa mga drayber nga activated sa ilang platform hangtod sa Hunyo 30; ikaduha, ang listahan sa mga drayber nga activated gikan Hulyo 1, 2017 hangtod sa Hulyo 17, 2017 ingon man ang listahan sa detalye sa mga drayber alang sa himuon nga drivers' database sa LTFRB ug ang presentasyon nga gipaambit sa Grab sa board.
Si Cu nibutyag nga moduso sila karong adlawa sa duha ka mga listahan sa ilang partner-drivers sa wala pa ang Hunyo 30 ug sugod Hulyo 1.
"Hindi pa natin na-mi-meet ang demand ng community for this type of service," dugang ni Cu sa ilang Facebook live niadtong Miyerkules sa gabii human sa ilang tigom tali sa mga opisyal sa LTFRB.
Niadtong Hulyo 21, 2016, ang LTFRB niisyu og moratorium batok sa pagproseso sa bag-ong mga aplikasyon sa mga drayber sa mga TNVS.
Si Elnar nidugang nga sukad sa maong kamandoan niabot og 700 ang natanggong nga mga aplikasyon sa ilang buhatan nga wa pa ma-approve.
Apan kapin sa 100 niini ang nahatagan nila og PA.
Karong sunod semana moanhi sa dakbayan sa Sugbo ang mga opisyal sa Grab ug Ubor aron makigtagbo ni Mayor Tomas Osmeña.