DEAR Dr. Fritz,
Maayong adlaw kanimo. Ako si Kenneth G. Minyo ko ug duha na ang among anak sa akong asawa. Apan sa pipila na ka tuig namo nga panag-uban ni misis, wala pa ko nakamatikud nga nagawasan kini siya. Iya gayud ni nga giangkon diha kanako. Gusto unta nako nga magawasan siya, kay paminaw nako nga maglisud gayud siya nga magawasan. Ako naman unta nga gihimo ang tanan nga magawasan siya. Pero daw wala may epek.
Unsa man ang maayo, dok, nga matabangan nako si misis nga malipay sad siya sa among seksuwal nga kinabuhi? Maluoy pod baya ko niya, dok.
Tabangi intawon, ko, dok. Daghang salamat.
Kenneth G. of Lanang
***
Dear Kenneth G. of Lanang,
Nakasabot ko sa imong sitwasiyon, ilabi na sa sitwasiyon ni misis. Maayo gani kay nagmatinud-anon si misis sa iyang gibati. Importante ka na aron matabangan nato kamong duha - kay lisud nga wala siya miangkon kanimo, lisud gayud nato siya matabangan. Anaa bayay mga babaye nga magpaaron-ingnon nga walay problema ug mameke na lang daw nga nagawasan sa kama, maskin wala. Naa, alaut gayud ang maong klase sa mga babaye.
Ang ako lang gusto unta ipangutana kanimo, kung unsa ang imong gihimo o mga nahimo nga wala nihatag og epek - kay matud pa nimo gihimo na nimo ang tanan.
Gusto lang nako nga mahinumdoman nimo nga sa isyu sa orgasm, ang mga babaye mas daghan ug demensyon.
Dili susama sa mga kalalakin-an, ang mga babaye daghang klase nga kasinatian sa orgasm o sa isyu nga magawasan, ug kini naga ugmad sa tibuok nga kinabuhi. Ang mapa sa erotiko sa lawas sa usa ka babaye wala gisulat sa bato, inay usa ka proseso nga nagaugmad ug nagalihok diha sa kasinatian, pagkadiskubre ug kanunay nga pagpanday.
Pinaagi sa pagrepaso sa karaan ug bag-o nga mga siyentipiko nga nadiskubrehan sa seksuwalidad, gitan-aw sa mga nagtuon ang ebolusyon sa debate sa orgasm sa babaye pinaagi sa mani mani o sa kinatawo. Ginatan-aw nila kung ang mga babaye makaabot ba sa tumang kainit pinaagi sa pagpainit pinaagi sa kinatawo lamang, o kung kinahanglan pa ba nga maapil ang pagpainit sa lawas pinaagi sa mani-mani sa usa ka babaye. Nasuta sa mga nagtuon nga dako ug bukad diay kaayo ang ganghaan niini kaysa ato nga kasagaran nga nahibaw-an.
Apan, usa kita magpadayon sa unahan, tungod kay taas-taas pa man ang atong pagahisgutan mahitungod niining imong sitwasiyon, tugoti ako nga ato kini nga padayunon og pagtuki sa mga sunod nga edisyon niining atong patik.
Hangtud sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)