ANG Koronadal FC mibulsa og duha ka titulo sa managlahing dibisyon sa 2nd Mayor Topoy's Football Tournament didto sa Montevista Sports Complex sa Compostela Valley Province.

Unang midaug ang Koronadal FC batok sa U10 division human gipildi ang host Montevista FC sa finals, 1-0. Ang Compostela FC maoy nahimutang sa ikatulong puwesto sa maong dibisyon.

Gisundan og daug sa Koronadal booters batok Montevista FC, 2-0, aron masungkit ang korona sa U13.

Ang Trento FC nabutang sa ikatulong puwesto. Samtang ang Maco FC maoy mihari sa men's open human gipayukbo ang Montevista FC, 3-2.

Samtang ang Nabunturan FC anaa sa ikatulong puwesto sa maong men's open.

Ang Urios University sa Butuan maoy nakakuha sa korona sa women's human midaug, 1-0, batok Davao Lady Knights.

Ang Butuan FC maoy mibulsa og titulo sa UC kontra Montevista FC, 3-0.

Apan human gipalukapa ang kalaban sa finals sa tulo ka dibisyon, Montevista FC midaug sa U17, 1-0, batok Nabunturan FC sa ilang kampeyonato.

Ang mga midaug nakadawat og medalya ug tropeyo sa torneyo nga gi-organisa kauban ang lokal nga gobyerno sa Montevista ug Montevista FC isip kabahin sa 49th Araw ng Montevista selebrasyon. (Ruji Peter Abat)