Lamberto G. Ceballos

Kawayan, Dalaguete, Cebu

MGA tulo na ka buwan nga nagka textmate sila si Janella ug Manolo nga mihangtod sa ilang pagka text uyab. Bisan wa pa sila magkita sa linawas, gisugot ni Janella, 21 anyos, si Manolo, 23 anyos, tungod sa matam-is nga mga pulong sa ulitawo. Gani panahon sa kagabhion sa di pa sila mangatulog mag-teksanay sila bahin sa ilang gugma. Dihang mihangyo si Manolo nga mag-text romance sila usa ka gabii niana, misugot si Janella. Nalipay sila sa gisangputan niini bisan gipaagi lang sa imahinasyon ang ilang gi-teks nga mga mensahe. Nausban pa kadto og pipila ka mga higayon.

Dia sa Foodcourt sa SM Cebu si Janella karong gabhiona, naghuwat nga moabot si Manolo. May dinner date sila sa alas siyete kay nagkasabot ganinang hapon nga magkita sa personal. Samtang nagpaabot sa ulitawo milakdop sa hunahuna sa dalaga kon unsa gayud ang hitsura ni Manolo. Nagduda siya nga dili tinuod ang gisulti ni Manolo nga kini kamay-ong ug kaamgid ni Matteo Guidicelli. Basin hinuon og kaamgid si Manolo ni Long Mejia. Na, putlon dayon nila ang ilang relasyon. Ngano man? Siya (Janella) nagtug-an man sa tinuod, nga ka-lookalike siya ni Sarah Geronimo. Nagkasabot sila sa sinina nga isul-ob. Si Janella magsul-ob og blawos nga pula nga may mga polka dot nga puti nga paresan sa skinny jeans nga itom; si Manolo mag T-shirt og asul nga paresan sa jeans nga maong.

Nagkasabot sab sila nga anha maghuwatay sa lamesa luyo sa stall sa Potato Corner.

Paglabay sa pipila ka gutlo may batan-ong lalake nga miduol sa gilingkuran ni Janella, pero di man kamay-ong ni Matteo. Guwapo hinuon ug dunay smiling face.

“Hi! I’m Manolo! Ikaw si Janella. Di ko mahimong masayop. May-ong ka kaayo ni Sarah.” Gitunol ni Manolo iyang tuong kamot kang Janella. Human maglamanuhay milingkod si Manolo atbang ni Janella.

“Nailhan tika tungod sa imong gisul-ob. Di man ka kaamgid ni Matteo ba!” ni Janella nga mipahiyom.

“Bitaw. Giparesan ko lang ang imong Sarah kang Matteo aron nindot atong teksanay,” ni Manolo nga mitindog. “Tana, adto ta sa Golden Luwag mag-dinner.”

Human sa ilang panihapon nanan-aw sila og sine. Ang salida kay You’re My Boss, starring Toni Gonzaga ug Coco Martin. Didto sa balcony sa Cinema 2 natilawan nila ang kalalim sa tinuod nga halok. Dako kaayog kuwang ang text kiss nga ilang nahimo kaniadto pinaagi sa selpon.

“Jan, tinuoron na lang nato ang atong panaghigugmaay,” hunghong ni Manolo. “Pagkakita nako nimo ganina nakahukom ko nga ikaw na ang akong higugmaon hangtod may kinabuhi pa ko.Di ba kanunay ko ni-teks nimo nga I love you so much? Tinuod na ning akong gibati ron. Kon gusto ka magpakasal ta, bisan secret una?”

“Unya ready na ka nga mangako sa responsabilidad sa pagbuhi og pamilya?” ni Janella.

“Oh, yes! Stable akong trabaho sa usa ka appliance company dinhi sa Cebu isip accountant.” Giagbayan ni Manolo si Janella nga midip-ig sa iyang ulo sa dughan sa lalake.

“Okey. Ibangkilya ko ang akong suweldo isip maestra sa kindergarten,” ni Janella nga mihangad kang Manolo.

Nagpadayon sila pagtan-aw sa salida. Wala na mag-agbay si Manolo kang Janella. May gi-teksan siya.

Unya mitunog ang selpon ni Janella. Iyang gibasa ang mensahe, “Mahal, adto ta sa Regal M. Ok ka? Angkunon nato ang gabii!”

Mibawos si Janella pagteks kang Manolo, “Ok!”

Nanindog sila ug nanggawas sa sinehan. Wala nila tiwasa pagtan-aw ang salida. (KATAPUSAN)