GRABING pangatawa sa mga kongresista sa mga pamalikas ni Presidente Rodrigo Duterte sa miaging State of the Nation Address (Sona). Abi nako og naanad na si Speaker Bebot Alvarez ug Majority Leader Rudy Fariñas. Wa diay.
Dihang nakabasa silang Alvarez ug Fariñas sa Facebook post ni Mandy Mercado Anderson nga naglakip sa pulong nga “imbecile.”
Sa Bisaya pa, ang buot ipasabot niini kay bogo, hanggaw, gago o ingon niini nga mga termino.
Gigamit kini ni Anderson, nga chief of staff ni Customs Commissioner Nick Faeldon sa paghulagway kang Alvarez ug ubang mga kongresista isip reaction sa hulga nga lusawon ang Court of Appeals.
Matod pa ni Anderson diha sa iyang private Facebook wall, “I’m hoping and praying he tries so he realizes what an imbecile he is when he fails. Isn’t there anyone else in the House composed of 200+ representatives who can actually be Speaker? Nakakahiya na!”
Dihang niatubang si Anderson sa usa ka congressional hearing kabahin sa P6.4 bilyones nga shabu nga nasakmit sa Bureau of Customs.
Way labot sa maong hearing ang Facebook post ni Anderson apan gikomprontase siya ni Fariñas kabahin niini kay giinsulto daw si Speaker Alvarez ug ang ubang mga kongresista.
Nahibung gyud ko nganong ingon ana kasuko kini si Alvarez.
Hangtod nga nitug-an kini si Anderson nga duna diay gihangyo kini si Alvarez nga promusyon alang sa customs employee nga dili qualified.
Dayon gibalibaran ang hangyo ni Speaker Alvarez.
Di lakas
Kining maong hitabo nakapahinuktok nako. Gibalibaran nilang Customs Commissioner Faeldon ang hangyo ni Speaker Alvarez.
Apan, dunay hangyo sa laing opisyal nga pailisdan ang usa ka collector nga topnother sa collection sa miaging tuig. Kining maong collector gi-congratulate pa gani ni Presidente Duterte tungod sa iyang achievement.
Kining maong opisyal nailhan nga tigsuporta ni Duterte panahon sa kampanya.
Apan tungod sa hangyo sa usa ka opisyal, giilisdan kining maong collector ug gihulip kaniya ang kanhi tigsuporta ni kanhi bise presidente Binay.
Buot ipasabot, dili diay ingon ana ka lakas nilang Faeldon ug Anderson si Speaker Alvarez. Alang kanako, mas sakit kini palandungon alang sa usa ka opisyal nga nagtuo nga gamhanan siya.
Mga macho
Alang kanako, angayang bantayan kining panagbangi kay dako ang posibilidad nga mag-isip kawtanay silang Faeldon ug Alvarez og mga isyu.
Pulos kini sila mga sinaligan ni Presidente Duterte nga niingong iyang ilisdan ang mga opisyal bisan og dunay “whiff of corruption” o gamayng baho lang sa pangurakot.
Sa pagkakaron, daghan kita og nadunggan kabahin sa ilang pagka macho. Apan kon ingon na man lang sab ang mga isyu, igo lang kini sila sugsogon ni presidente. (@anol_cebu sa Twitter)