TULO ka tinun-an sa School of Education sa University of San Carlos (USC) nanudlo og Descriptive Text sa junior high ug Practical Life sa kinder didto sa Indonesia sa usa ka bulan nga international pre-service teaching.
Usa ka exchange program sa Southeast Asian Ministers of Education Organization (SEAMEO), naila kini nga SEA Teacher Project.
Ang tulo ka mga Carolinians naglakip nila Mary Nikka Richae C. Abangan (BS Education, Major in English), Jeciel Dacillo Orias (Montessori Education) ug Jan Joshua Cuevas (Bachelor of Elementary Education).
Sa susamang practicum bag-ohay pa lang, gidawat sab sa USC sila si Yayang Juniarta ug Dea Dimyathi Agus Putri nga mga taga-Indonesia ug si Sattabut Hemarak nga taga-Thailand.
Lakip sila sa 200 ka mga tinun-an sa kolehiyo gikan sa 31 ka mga unibersidad sa Indonesia, Thailand, Japan ug Pilipinas nga miapil sa programa nga nagtanyag og kahigayunan sa mga student teachers nga makasinati nga nanudlo sa laing nasud sa habagatang-silangang Asya.
“Gipasigarbo namo ang among mga tinun-an nga napakita nila ang Carolinian nga pamaagi sa pagtudlo,” mipadayag si Geraldine C. Villaluz, RSCJ, Ph.D., tagduma sa research sa USC School of Education.
Nanudlo si Abangan og Descriptive Text ubos sa subject nga sa Bahasa Inggris 5 (Bahasa English 5) didto sa Yogyakarta State University - Junior High School nga nahimutang sa Wates, Yogyakarta sa habagatan sa Java Island.
Nanudlo sab si Cuevas og Descriptive Text sa susamang subject sa Grade 8 didto sa PGRI University of Yogyakarta - Secondary School sa Kota Yogyakarta, tunga-tunga sa samang rehiyon nga gitung-an sa mga dakbayan sa Jakarta sa halayong kasadpang bahin ug Surabaya sa halayong sidlakang bahin.
Sa laing bahin, nanudlo si Orias og Practical Life sa mga gagmayng bata sa Quantum School sa Pakuan University didto sa Bogor, West Java nga nahimutang habagatan lampas lang sa utlanan sa Jakarta.
Samtang dinhi sila sa Sugbo, nanudlo sab ang mga bisitang langyaw sa mga klase sa Grade 10 sa USC South Campus – English kang Juniarta, samtang Siyensa kang Putri, ug Math kang Hemarak.
Walo ka mga institusyon sa edukasyon dinhi sa Pilipinas ang miapil sa SEA Teacher Project nga misugod sa unang grupo sa Enero sa miaging tuig, gisundan sa ikaduha pagka-Agosto. Miapil ang USC sa ikatulo nga bag-ohay pa lang napahigayon. (PR)