DEAR Papa Joe,
Ang akong suliran kabahin sa akong mama ug akong ka live in. Ako diay si Neil, 22 anyos. Usa ko ka guard sa usa ka construction site diri sa Cebu. Ang akong pamilya naa sa Ronda. Akong mama u gang akong kapuyo maoy kauban sa akong upat ka tuig nga anak.
Karon ang akong asawa ni text nako nga makigbuwag na lang siya nako kay wa siya mauyoni ni Mama. Karon akong giingnan akong ka live-in nga moapas sila sa among anak diri sa siyudad. niingon siya nga mas maayo na magbuwag na lang mi kay di sad niya madawat ang akong mama.
Kon akong pangutan-on akong mama kon naunsa sila, di man sad motug-an akong mama. Moingon lang nga pangutan-a imong buotang asawa.
Kon pangutan-on sab nako akong asawa, mangambot siya ug moingon lang nga di siya kasabot sa akong inahan. Akong giingnan akong asawa nga huwaton ko aron ma settle pero niingon siya nga nakahukom na siya nga di na mobalik nako ug maayo pa magkuyog na lang mi sa akong mama.
Ako siyang gipangutana kabahin sa among anak. Niingon siya nga suportahan na lang ug mao ni ang nakapalibog nako kay naapektuhan na ang akong trabaho karon. Palihug tambagi ko.
NEIL
Neil,
Mas maayo nga sa labing madaling panahon, mouli ka di man sad na ingon ana ka layo ang Ronda nga labangon og dagat para masayod ka sa kamatuoran kon kinsa ang nakasala. Pero kon sala man sa imong mama, dili sad siguro makigbuwag dayon nimo imong asawa, di ba?
Ug tinud-anay na nga nahigugma nimo imong asawa, andam sad siya mosabot sa imong mama hangtod nga moabot ka para mahusay. Kay pwede tuod sayop sa imong mama kay basin bunga sa pangigi kay mangigi baya gyud nang ubang mama sa ilang anak nga lahi na ang gitagaan sa atensyon. Basin sad di pasulti imong asawa.
Usa sad sa mga silingan o mga igsuon nimo nga maka testigo sa hitabo. Basin og imong asawa sad-an mao nga makigbuwag siya kay kahibawo siya nga dihado siya, adto ka modapig sa imong mama o ba kaha wa na gyud siyay gugma nimo ug nagmilagro. Busa ulia sa didto. Daghang salamat.
Papa Joe
(sa inyong tampo ipadala sa papajoesuperb@gmail.com)