Greco, kapuyo nasikop sa raid

ANAK ni anhing Bise Gob. Gregorio Sanchez nga si Leodigreco "Greco" Sanchez gipu sasan human nakuhaag daghang armas ug mga drug paraphernalia uban sa iyang kapuyo sa pagronda sa ilang gipuy-an sa Sitio Tangke Brgy. San Juan, lungsod sa Tuburan, kagahapon sa alas 8:00 sa buntag.

Lakip sa gipusasan ang kapuyo nga si Maricel Gregory, 33, taga Parian, dakbayan sa Sugbo ug duha ka bodyguards nga sila si Glen Nacion, 40, taga Englis, Barangay Guadalupe ug Julbert Jacaba, taga Buena Hills, Guadalupe.

Ang gipuy-an ni Sanchez gironda sa team nga gipa­ngulohan ni Supt. Joie Yape, Jr., hepe sa Provinvial Intelligence Branch sa Cebu Provincial Police Office (PIB-CPPO).

Uban sa joint operation mao ang Regional Intelligence Division (RID-7), Provincial Public Safety Company (PPSC,) Maritime Police 7, Provincial Drugs Enforcement Units (PDEU-CPPO) ug Special Weapons and Tactics (SWAT-CPPO), pi­na­sikad sa search warrant nga gi-isyu ni Executive Judge Jacinto Fajardo, Jr. sa Regional Trial Court (RTC-7) Branch 66 sa dakbayan sa Talisay.

Nakuha sa kapulisan sa cottages sa farm ni Sanchez ang usa ka kalibre .45, usa ka magazine nga may 6 ka mga bala.

Usa ka upper barrel sa colt super .38, usa ka magazine sa kalibre .45 nga dunay lima ka mga bala, 9 ka kabhang sa super .38, usa ka bala sa 5.56 caliber, usa ka replica sa M16 rifle dunay magazine, usa ka replica sa 9mm pistol, usa ka air rifle, 22 ka tin foil, 4 kabuok ligther, 2 ka improvised burner, improvised tooter nga dunay namilit nga shabu.

Si Yape niingon nga usa ka bulan nilang gi-monitor si Sanchez, kinsa high value target sa kapulisan sa probinsya sa Sugbo.

Matod pa niini nga daghan sab nga nadawat nilang reklamo sa mga residente sa lugar kabahin sa pagsige'g pabuto ni Sanchez hinungdan sa ilang kahadlok.

Si Yape nibutyag nga si Sanchez dunay koneks­yon sa namatay nga druglord nga si Alias "Tuskig."

Si Sanchez niangkon sa mga armas nga nakuha nga depen­sa niya sa kawatan.

"Nagbasa kog newspaper sa miaging adlaw kabahin sa pagkasikop ni Mayor Ricky Ramirez, ako nahunahunaan na basin ako pud isunod ani natinuod man hinuon," dugang ni Sanchez.

Ang kapuyo nga si Maricel, kasuha'g paghupot sa illegal nga drugas sanglit dunay nakuhang drugas sa iyang bag ug drug paraphernalia.

Ang mga dinakpan gitanggong karon sa awtoridad.

Samtang, si kanhi Provincial Board member Grecilda 'Gigi' Sanchez, maguwang ni Greco, nakugang dihang ni-text si Greco niya ug nipahibawo nga dunay mga pulis sa ilang balay sa Tuburan.

Si Gigi niasoy nga niabot sa punto nga dunay mga molupyo sa Barangay San Juan ang nireklamo sa pulis gumikan sa giingong pagpabuto ni Greco og armas.

Matod niya kagahapon ang usa sa mga adlaw nga iyang gikahadlokan ug namahayag nga nabuhat na niya ang ta­nan alang sa iyang manghod.

“Wala ko nagkuwang sa pagpahimangno, tanan tambag...” dugang ni Gigi.

Siya naglagot sa gidili nga drugas nga niguba sa kinabuhi sa iyang manghod ug sa ubang mga tawo nga naa sa sitwasyon sama nila.

“He is a victim of drug me­nace in our society,” dugang niining motabang sa manghod.

Sa laing bahin, usa ka barangay kapitan sa lungsod sa Medellin ang boluntaryo nga nitahan sa iyang wa'y lisensiya nga armas niadtong Biyernes.

Ang kapitan mao si Oscar Banzon, 54, kapitan sa Barangay Kawit, nga nagpuyo sa Sitio Proper sa maong barangay. (Dugang ni SCG, HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph