ANG problema sa pag-abuso sa gidiling druga nagkalawom ug ang epekto masaksihan mismo sa mga ngilngig nga pangtaho sa sulod sa pamilya, ang batakang han-ay ug pundasyon sa sosyodad, busa nahimo na kini nga usa sa mga hulga sa nasudnong seguridad karon.

Sama sa kaso sa bespiras sa Father’s Day, usa ka amahan nimartilyo-patay sa iyang asawa, ni­suway sa pagpatay sa anak ug naghikog pinaagi sa pagdunggab sa iyang dughan niadtong Sabado sa sa­yong butag sa sulod sa ilang payag sa Barangay Lahug, dakbayan sa Sugbo.

Ang kinatibuk-ang ngilngig ug duguong panghitabo nasaksihan sa 11-anyos nga batang lalake.

Sumala sa taho, ang inahan gikan pa intawon nangompra og mga utanon sa merkado aron magluto og sud-an aron ipamaligya sa pipila ka buhatan sa dakbayan ug nagplano pa unta ang magtiayon nga mangaon sa restaurant atol sa Father’s Day. Apan, ang bana gikataho nga kalit nasuko sa asawa tungod sa walay basihanan nga pagpangabubho mando sa pagkagumon niya sa shabu, druga nga nagtuis sa pangutok sa mga adik.

Usa lang kini sa daghan na kaayong ngilngig nga kaso tungod sa pag-abuso sa gidiling druga sa suspek sa krimen. Kon wala makonsensiya ang mga druglord o mga sakop sa sindikato sa drugas, makaingon lang hinuon kita nga unsa kaha kon mahitabo kini sa ilang kaugalingong pamilya? Malipay ba kaha sila?

Kon maguba gani ang labing batakan nga gambalay sa kagamhanan nga mao pamilya, seguradong daot nga komunidad ang motunhay ngadto na sa labing taas nga organisasyon sa nasod, hinungdan nga ang drugas giisip nga hulga sa seguridad sa nasod.

Dakong hagit natong mabuot nga lungsoranon nga motabang sa awtoridad sa pagpakigbatok ug pagsumpo sa gidiling drugas. Unya na ba ka molihok kon apektado na ang imong pamilya?