NIADTONG Hulyo 22 hangtod 23, gipahigayon sa Ateneo de Davao University, Jacinto campus, ang Asean Civil Society Summit on the Environment.
Usa kini ka proyekto sa mga environmentalists sulod sa 10 ka nasud nga sakop sa Association of Southeast Asian Nations (Asean) diin ang Pilipinas ang nangulo karon.
Gitambongan kini og sobra 100 ka mga delegado ug siyempre dili magpaulahi ang Davao kay daghang mga grupo nga nakaapil.
Naa didto ang UCEAC ug Ateneo Public Interest and Legal Advocacy Center (Apila), Interface Development Interventions, Our Rivers, Our Life Philippines, Mindanao Action Group for Children's Rights and Protection, Philippine Movement for Climate Change, Asian People’s Movement on Debt and Development, Association of Community Ecology and Development, Association for Community Development, Center for Energy Ecology and Development, Climate Reality Philippines, Freedom from Debt Coalition, Green Thumb Coalition ug, Santi Sena Organization-Cambodia.
Gisuportahan kini sa Terre des Hommes Germany ug German Cooperation nga dugay nang nag-ayuda sa mga proyektong pangkinaiyahan ug mangkalamboan sa nasud.
Human sa maong panagtigum, nakahimo kini'g Manifesto sa ilang nakitang kahimtang sa kalibutan nga nakapasamot sa climate change sama sa magpasuwabi sa kinitaan sa mga dagkong negusyo sa mina, pagpang-abuso sa tawhanong katungod ilabi na sa mga tawo nga nagprotekta sa kinaiyahan ug katungod sa mga lumad, babaye, kabataan ug may kabilinggan.
Unod sa maong Manifesto ang dugang protekta ug saktong paggamit sa kinaiyahan nga gipanag-iyahan sa tanan; sustenidong paglambo aron maseguro nga masunod sa sunod nga henerasyon ug kaliwatan; pagpakaylap sa paggamit og "renewable energy" inay nga magpabilin sa paggamit ug lana ug "fossil fuel" gikan sa yuta; ug pag-apil ug pagpaminaw sa tingog ug baruganan sa mga bata ug kabataan.
Ubay-ubay ang isyu nga ilang giduso gawas sa climate change. Anaa usab ang ilang panawagan sa "biodiversity", enerhiya, tinubdan sa tubig, "ecological child rights", ug sa kasamtangang giyera ug kagubot sa bisan asang lugar sa Asia apil na ang Pilipinas diin gipahamtang ang Martial Law hangtud sa katapusang adlaw sa Disyembre.
Apil usab sa panawagan ang pagtamod sa International Humanitarian Laws sama sa UN Convention on the Rights of the Child, UN Guiding Principles on Business and Human Rights, Extractive Industries Transparency Initiatives, pagpahunong sa "dirty energy funding" sama sa coal-fired power plants sa Asian Development Bank, World Bank, International Monetary Fund ug AIIB. Ang ika-duhang State of the Nation Address ni Presidente Duterte niadtong Hulyo 24 nagbutyag sa iyang laraw sa isyu sa kinaiyahan sa nasud nga makaingon ta nga nitakdo sab sa pipila ka panawagan sa Manifesto sa mga delegado sa maong summit.
Usa niini mao ang pagpahamtang og taas nga buhis sa mga kompaniya sa mina ug pag-ayo sa ilang giguba ug paglimpyo sa ilang hugaw nga sa palibot.
Mao sab unta kini ang gihandom sa nasanggi nga DENR Secretary Gina Lopez.
Maayo sab ang iyang panawagan nga dili na kita mopadala og hilaw nga materyales ngadto sa laing nasud, hinunua ipalambo nato ang industriya nga gikan sa natural nga rekursos sa pagpauswag sa nasud.