MAGSILBI nga pasidaan batok sa mga pulitiko nga nalambigit gihapon sa pagpamaligya sa gidili nga drugas ang nahitabo nga operasyon sa siyudad sa Ozamiz kagahapon sa kaadlawon diin napatay si Mayor Reynaldo Parojinog, Sr. ug laing 14 ka mga tawo.
Kini sumala ni Philippine Drug Enforcement Agency 7 Director Yogi Filemon Ruiz.
Si Parojinog, naapil sa listahan sa mga pulitiko nga nalambigit sa illegal drugs nga gibutyag ni Pres. Rodrigo Duterte niadtong Agusto sa miaging tuig, nga naglakip sa mga pangan nila ni Daanbantayan Mayor Vicente Loot, kanhi Cebu City Mayor Michael Rama, gidudahang drug lords Franz Sabalones ug Kerwin Espinosa.
Si Ruiz nanghinaot nga ang operasyon sa Ozamiz maghatag og warning sa uban nga nagplano mosud sa negosyo sa illegal drugs.
Niadtong Hulyo 5, gidakop sa PDEA 7 si Malabago, Badian Barangay Kapitan Epifania Divinagracia Alvizo ug kakonsabo nga si Ronan Lastimoso Librando.
Nasikop usab sa kapulisan ang tulo ka mga konsehal sa lungsod sa San Fernando nga sila si Johnny Arriesgado, Edwin Villaver, ug Alfonso Donaire IV. Sila gidudahang protectors ni Sabalones, apan ila kining gipanghimakak. (SCG)