BATA naghikot og habol sa iyang liog human giingong naguol nga wa magkasinabot sa iyang mga igsuon niadtong Sabado sa alas 4:40 sa hapon sa Sitio Banica, Barangay Ocaña, dakbayan sa Carcar.

Si Jane (dili tinuod ngalan), 15, dead-on-arri­val (DOA) sa tambalanan sa Carcar human makit-i sa iyang mga kabanay nga na­gbitay sulod sa ilang lawak.

Si SPO3 Jorame Tanudtanod, imbestigador sa Carcar Police Station nga nahinabi sa Sun.Star Superbalita, nagkanayon nga way foul play kon dili naguol lang ang bata sa iyang sitwasyon.

Matod pa niini nga nagbilin og suicide note sa iyang selpon ang biktima.

Si SPO3 Tanudtanod, miingon nga ang step mother sa dalagita maoy nakadiskubre dihang na­abot gikan sa lakaw.

Nakugang siya kay nagbitay na diha sa ilang lawak nga gigamit ang habol sa paghikot sa liog niini hinungdan nga mising­git kini og pana­bang sa mga kabanay ug silingan.

Gipadayag niini nga ang biktima dunay mga igsuon sa iyang amahan, diin dili sila magkasinabot hinungdan nga naguol kini ug nagpakamatay.

Ang inahan sa bata gikataho nga tua na magpuyo sa kaulohan human nagkabuwag sa iyang amahan.

Sa miaging semana, usa ka 17-anyos ang naghikog usab sa samang barangay tungod sa pagpangluod human wa­la paliti og tambal alang sa labad sa ulo.