DUL-AN sa P500,000 ang nakuha sa tulisan gikan sa usa ka negosyante nga naglakaw sa dan Magallanes, Barangay Sto. Niño, siyudad sa Sugbo niadtong Sabado sa ha­pon.

Si Maura Amaro Ylaya, 38, negosyante og utanon, minyo ug molupyo sa dan Dimasalang, Barangay Pahina Central.

Giingon nga kauban ni Ylaya ang iyang higala nga si Julito Balio Silgas, 30, ug molupyo sa dan Climaco eskina Magallanes, Pahina Central.

Base sa imbestigasyon sa Theft and Robbery Section (TRS) sa Cebu City Police Office (CCPO) nasayran nga ang duha naglakaw duol sa La Nueva Supermarket.

Matod sa hepe sa TRS, Chief Insp. David Señor, vegetable supp­lier si Ylaya sa mga mall ug magkuhaan sa Magal­lanes sa iyang mga utanon.

Dugang ni Señor nga padulong unta mobayad si Ylaya sa iyang mga gipangkuhaan og utanon, kalit lang siya gitiunan og armas sa usa ka tulisan ug ang usa nag-atang sa motorsiklo.

Nakuha ang sling bag ni Ylaya nga duna'y sud nga P435,000 ug duha ka mga cellphone nga nagkantidad og P17,000.

Ang imbestigasyon sa TRS ipadayon karon.