GIHIKTAN og wire ang liog sa saleslady, gilugos ug gipatay sa iyang bayaw nga adik sulod sa ilang panimalay kagahapon sa alas 7:00 sa buntag sa Sitio Garden Barangay Poblacion, dakbayan sa Talisay.

Si Manilyn Saballa, 28, minyo ug saleslady sa Gaisano Tabunok, hubo na ang tibuok lawas ug patay nang nakit-an sa iyang kabanay nga may samad sa agtang ug dinunggaban sa liog.

Si Supt. Germano Mallare, hepe sa Talisay Police Station nga nahinabi sa Sun.Star Superbalita, nagkanayon nga wa na igkita ang suspek nga si Alfonso “Allan” Saballa, 35, minyo ug drayber sa PUJ.

Sumala sa kapulisan, si Alfonso, maguwang sa bana sa biktima nga si Victor Saballa, 28, usa ka drayber apan tua sa Qatar nagtrabaho sulod na sa 2 ka tuig ug schedule nga mopauli karong Agusto.

Ang suspek wa na maabti sa kapulisan sa bukirang lugar sa Kampo 4, apan ang motorsiklong gisakyan niini gibilin ug nakuha sa awtoridad.

Usa ka Benzniel Bolo, 21, ulitawo ug silingan maoy nipahibalo sa kapulisan kabahin sa krimen human nahitabo ang grabing pagsiyagit

sa mga sakop sa pamilyang Saballa.

Atol ning pagsuwat, ang lawas sa biktima ipaubos sa autopsy aron masuta kon unsay namatyan niini ug pagsuta bahin sa giingong gilugos kini sa wa pa patya.

Si Mallare niingon nga sa gihimo nilang imbestigasyon, ang biktima nagpuyo sa panimalay sa iyang ugangan sa pikas kuwarto uban sa iyang duha ka mga anak Vanessa, 6, ug Princess, 3.

Ang suspek nagpuyo sab sa pikas lawak uban sa pamilya niini diin ang sala lang nila maoy nag-uwang sa duha ka mga lawak diin sila nitipon sa panimalay sa ilang ginikanan nga si Ediliza Saballa, 60.

Si Manilyn natulog mga alas 11:00 sa gabii niadtong Sabado, gumikan sa kakusog sa uwan hinungdan nga nakasulod ang suspek sa lawak nga wa mahibaw-i.

Gidiretso sa pagtuok ang biktima dayon gilugos, apan namatay kini kay gidunggab ang liog sa screw driver hinungdan nga gihiktan niya

ang liog ug giputos sa banig.

Gilabay nila sa bintana nga nahagbong didto sa ilawom sa panimalay nga lawom kay dunay kanal panahon sa ting-uwan mibaha ang maong dapit hinungdan nga buntag na nakit-an ang biktima.

Si Archie Lopez, 30, maguwang sa biktima, nitug-an sa mga tigbalita nga alas 11:00 niadtong Sabado ang iyang manghud nga si Jessa, mitawag kanila nga mangayog abag kay gisunog ang ilang panimalay sa suspek.

Hinungdan nga gidali nila sa pag-adto ang iyang mga igsuon sa dapit apan ang biktima wa kini nila makita hinungdan nga ang anak niini nga 6 anyos gidala nalang nila sa Camp 7 sa Minglanilla.

Apan nagduda sila kay wa motubag ang biktima sa ilang tawag sa selpon hinungdan nga pagkabuntag gipangita nila hangtud nga giguba nila ang sawog nga kahoy sa panimalay.

Nakugang sila kay ilang nakita ang tuhod sa usa ka tawo didto sa ubos nga giputos sa banig, sa pagsusi ang iyang igsuon wa nay kinabuhi.

Si Jessa, manghod sa biktima, nitug-an nga ang iyang maguwang nga biktima didto sa kwarto niadtong higayuna samtang siya natulog sa sala uban sa pag-umangkon nga 6 anyos.

Nakamata siya dihang nabasa sa gasolina ang iyang buhok dihang gibuboan sa suspek ang panimalay kay dauban unta niini aron itago ang krimen.

Gikuptan siya sa suspek dayon gisumbag siya hinungdan sa pagkasamad sa wala nga bahin sa iyang mata, dayon nawad-an sa panimuot niadtong higa­yona.

Nakamata siya dihang nasunog ang iyang buhok hinungdan nga nangayo silag abag sa mga silingan, giluwas ang pag-umangkon apan wa niya makit-i ang iyang maguwang.

Mga silingan mitabang sa pagpawong sa kayo hinungdan nga wa makadako.

Ang suspek nakit-an sa mga silingan nga diha sa gawas nga wala magtsinelas mitabang sa pagpugong sa mga tawo nga pasagdan nalang ang pag-ulbo sa kayo kay dili na matabang.

Human niini, midagan mikuha sa iyang motorsiklo ug paspas nga mibiya palayo sa maong lugar hangtud ning pagsuwat wa pa madakpi.

Ang mga silingan sa lugar wa sab makadungog og mga kasikas nianang Sabado sa gabii ug Dominggo sa kaadlawon hangtud nga nahibaw-an ang krimen pagkabuntag.

Ilang gikuhaan og detalye ang asawa sa suspek nga si Melchora, 43, apan wala masayod kon asa kini atol sa krimen.

Nakuhang impormasyon sa kapulisan nga ang suspek nagumom sa gidiling druga ug lahi na ang pagpanglihok niini ning ulahi.

“Basin sabog ni sa druga, unya misukol gipatay niya. Pero atong ipa-autopsy aron pagsuta wa ba lugosa kay duda mi tungod kay hubo ang tibuok lawas sa biktima dihang nadiskubrehan,” dugang ni Mallare.

Si Jessa, manghod sa biktima, ug si Ediliza, inahan sa suspek, nikompirmar nga tiggamitan og illegal nga druga si Alfonso.

Gikompirmar sab nila nga ang suspek dugay na nga naibog sa biktima, kinsa mismo nakasakop niini dihang gibuso siya ni Alfonso.