Kalihokan sa Higalaay Festival kasado na

KASADO na ang tanan mga dagko ug gagmay’ng kalihokan alang sa kapistahan sa patron San Agustin sa dakbayan sa Cagayan de Oro.

“Business as usual” ug padayon sa paglambo ang dakbayan taliwala ubos ang Mindanao karon sa martial law ug dili gakawala kining mga hulga sa terorismo.

Si Dorothy Jean Pabayo, chairperson sa City Tourism Council, namahayag nga adunay 14 ka mga dagkong kalihokan ang dakbayan samtang 69 niini ang mga parrallel events.

Lakip niining core events nga kalihokan sulod sa usa ka bulan sa Agusto nga nagsugod kagahapong adlawa mao kining Agri Fair and Garden Show, Mindanao Fashion Summit, Asean Landmark Lighting, Cowboy Festival, Kahimunan Regional Trade Fair 2017, Kagay-an Festival Marathon, Carnival street dance competition, Higalaay Choral Competition, Higalaay Mindanao Expo 2017, Miss Cagayan de Oro 2017, Street Parade and Floats, Bisperas Fireworks, Religious and Fluvial Parade, Pyro Musical Festival, ug usa ka bulan nga Higalaay Festival Sale.

Gipaniguro ni Pabayo nga magtambayayong ang tanan aron saulogon kini nga malinawon ug puno sa kasadya.

Sa bahin ni Konsehal Jay Roa Pascual, kinsa chairman committee sa turismo, nipaabot kini ngadto sa katawhan nga mosunod lang sa mga gidili panahon sa mga kalihokan aron malikayan ang kagubot ug kalangan sa pag-check sa ilang mga dala. Usa sa gidili kining pagsul-ob og shades ug pagdala og backpack.

Gidugang sab niini nga kung mahimo dili na dalahon ang mga gagmay’ng bata aron sab delikado kung adunay mga dili malikayan nga mahitabo.

Hinuon mapasaligon si Police Senior Superintendent Roy Bahian ,ang city police director sa Cagayan de Oro City Police Office, nga ilang himoun tanan aron malinawon ang kasaulogan sa kapistahan karong bulan.