NAANGKON sa Alaska Aces ang no.1 nga luna human nila gipakgang ang sunodsunod nga himaya sa San Miguel Beermen, 82-77, niadtong Sabado sa kombati sa mga lider sa Philippine Basketball Association (PBA) Governor’s Cup sa Panabo, Davao del Norte.

Ang Aces ninglansang sa no.1 nga luna pinaagi sa ilang 8-2 nga rekord samtang ang Beermen nadakin-as sa ikaduhang dapit dala ang 8-3 nga baraha.

Ang Aces, nga aduna pa’y usa ka duwa nga nahabilin, ningputol sa walo ka sunodsunod nga kadaugan sa Beermen.

Human gipapas sa Beermen ang ilang 21 puntos nga labaw, ang Aces ningsandig sa katakos sa ilang pointguard nga si Jayvee Casio sa hinapos nga bahin aron ipreserba ang kadaugan.

Ang import nga si Romero Travis, kinsa nangulo sa kabangis sa Aces sa 1st half, nimugna og 32 puntos ug 10 rebounds aron pangulohan ang kadaugan.

Si Calvin Abueva nidugang og 12 puntos samtang nitampo og pito ka puntos matag usa sila si Casio ug Chris Banchero alang sa kadaugan.

Gipahimuslan sa Aces ang sunodsunod nga turnovers sa Beermen sa sayong bahin aron pagposte og 23-10 nga labaw human sa 1st quarter.

Sila si Casio, Abueva ug Dondon Hontiveros ningsuporta kang Travis aron protektahan ang maong labaw sulod sa taastaas nga panahon.

Ang Beermen ningkamang hangtod nga nailog nila ang labaw, 77-74, sa hinapos nga bahin.

Ninglihok pagbalik ang Aces aron bawion ang labaw ug diretso na paingon sa ilang hingpit nga kadaugan.

Ang Beermen gipangulohan ni import Arizona Reid pinaagi sa iyang 17 puntos, nidu­gang og 15 puntos si Ronald Tubid samtang nitaamot og 12 puntos si Junemar Fa­jardo.

Puntos matag usa:

Alaska (82) – Travis 32, Abueva 12, Casio 7, Banchero 7, Baguio 6, Thoss 6, Dela Rosa 5, Hontiveros 5, Dela Cruz 1, Manuel 1.

San Miguel (77) – Reid 17, Tubid 15, Fajardo 12, Ross 8, Cabagnot 8, Santos 6, Lassiter 5, Espinas 5, Lutz 1.