DAGHAN kaayo nga klase sa amahan ning kalibotan ug sa walay pagduha-duha, aduna usab daghang rason nga angayang pasalamatan nato ang atong mga minahal nga amahan.

“Kung makadaog lang ko og dakong kantidad sa lotto, mobalik gayud ko sa akong asawa og anak.” Kini nga linya ni Tatay Danilo Badenio, 70, taga Macasandig, Dakbayan sa Cagayan de Oro, diin nagpakita lamang kung unsa ang iyang pagpaningkamot aron makabalik sa iyang pamilya.

Giingong pito na ka tuig sukad nga mipalayo kini sa iyang asawa kinsa anaa karong mga panahona sa kaulohan.

Aduna'y usa ka anak si Tatay Danilo nga lalaki ug kasamtangang nagtungha pa sa kolehiyo isip usa ka seaman.

Sakit sa buot niini ang pagpalayo gikan sa iyang pamilya apan angay niini nga buhaton tungod kay dili na usab niini makaya ang demanda ug mga etorya sa iyang asawa.

Buot, matod pa niini, nga mahatagan sa gusto niining pangayuon nga kantidad diha-diha lamang ilabi na kay lage medyo bata-bata pa kini kumpara kaniya.

Makita sa mga mata ni Tatay ang pagpaningkamot aron mahatagan sa maayong kaugmaon ang pamilya apan subo pamalandungon tungod kay namaligya lamang siya diha sa kadalanan og sigarilyo, kendi ug uban pa.

Kanunay nga makita si Tatay Danilo diha sa may tunghaan nga nahimutang sa sentro ning dakbayan ug usahay diha sa Carmen.

Dili paigo ang kita niini kung magpadala pa ngadto sa iyang anak mao nga ang pagpamasin lamang niini nga moigo sa lotto ang gilaumang makapahiusa niini ngadto sa iyang pamilya.

Gisaysay niini nga niadtong milabay nga tuig,, usa na lamang ka numero ang kulang og modaog na unta kini sa kantidad nga P11 milyones apan mapasalamaton gihapon kini tungod kay nakadaog og P20 mil mao nga dali kining miadto sa kaulohan aron duawon ang iyang anak ug gani ang tanang da-og niini gihatag sa pinalangga niini nga anak.

Makapatandog kaayo ang kahimtang ni Tatay Danilo mao nga bisan gamay lamang ang tsansa niini nga modaog sa lotto apan padayon kini nga nangandoy ug naglaom aron lamang nga mahiusa pagbalik ngadto sa iyang pamilya.

Bisan pa man sa pangidaron ug kahimtang niini makita gihapon sa mga mata niini ang positibo nga panan-aw sa kinabuhi ug dakong paglaom ilabi na kung alang sa iyang pamilya.

Happy Father’s Day kanimo Tatay Danilo!