NANGUROG sa kahadlok ang kahera sa swertes human gitulis sa wala maila nga suspetsado niaging adlaw sa Barangay Casinglot, lungsod sa Tagoloan, Misamis Oriental.
Giila ang biktima nga si Feliciano Maceda, hingkod ang edad, residente sa susamang dapit.
Gisaysay sa biktima nga nahuman na siya og audit sa kita niadtong gabiona ug nakurat siya dihang kalit nga dunay mition kaniya.
Sa pirmero, nagtuo lamang siya nga gibinuangan siya sa iyang higala apan dihang gibati na siya og kasakit sa liog tungod sa hugot nga pagtion kaniya og pistola. Dungan niini ang pagdeklarar og tulis ngadto kaniya.
Tungod sa iyang kahadlok nga pusilon, walay pagduha duha nga iyang gihatag ang kita niadtong gabhiona apan wala pa nakuntento ang suspetsado ug gikuha pa ang laptop, uban sa iyang cellphone.
Gibaharan usab siya nga dili molihok kay patyon, hinungdan nga wala na lamang milihok ang biktima tungod kay iyang huna-huna niadtong tungora nga ang kantidad ug mga butang makita ra apan iyang kinabuhi kung mawala dili na mahibalik. Daling misibat ang suspetsado human sa pagpanulis.
Ang kaso gipablotter na sa Tagoloan Police Station diin gisunod ug giimbestigahan na sa kapolisan aron pag-ila sa mga suspetsado. (SVB)