MAGSAULOG ang Sugbo sa ika-500 ka tuig sa pag-abot sa Kristiyanismo sa atong kabaybayonan sa tuig 2021. Dinhi sa Sugbo nahitabo ang unang pagbunyag sa mga bag-ong Katoliko. Sa ginaingon pa, ang Sugbo mao ang “cradle of Christianity,” ang duyan sa Kristiyanismo sa Pilipinas.
Kadtong nakalimot sa atong kasaysayan, paminaw na lang mo sa kanta ni anhing Yoyoy Villame nga giulohan og Magellan. Ang unang mga linya niini nagkanayon, “On March 16, 15 hundred 21/ When Philippines was discovered by Magellan/ They were sailing day and night across the big ocean/ Until they saw a small Limasawa island.”
Ang ikatulong stanza niingon, “When Magellan landed in Cebu City/ Rajah Humabon met him, they were very happy/ All people were baptized and built the church of Christ And that’s the beginning of our Catholic life.” Nakahibawo na mo kon unsay gidangatan ni Magellan didto sa Mactan.
***
Si Cebu City Mayor Tomas Osmeña namahayag nga kinahanglang limpyohan ug paninduton ang syudad sa Sugbo alang sa maong selebrasyon. Unang nakit-an sa mayor mao ang nagkayamukat nga mga alambre nga nagbitay sa mga poste sa atong syudad, ang gitawag nga mga “spaghetti wires.”
Nagtuo tingali ang mayor nga ang tanang mga bisita sa syudad sa Sugbo magpunay og hangad sa taas ug ang mga spaghewtti wires da ang makit-an. Unya, kadtong di mohangad ug magduko, di kaha nila makit-an ang nagpasad nga mga basura sa syudad nga wa makolekta bisan pa sa paghaylo nga hatagan ang mga tawo og sardinas?
Gihinay-hinayan na sa Visayan Electric Company og tangtang ang mga overhead wires dinhi sa syudad sa Sugbo. Kon inyong susihon ang Osmena Boulevard, gikan sa Kapitolyo ngaadto sa Fuente Osmena, di na ka makakita og nagbitay nga mga alambre.
***
Gihatagan ni Osmena ang mga kompaniya og tulo ka tuig sa paghawan sa maong mga spaghetti wires. “Before that event, we will cut all the black wires. All those things garbled around will all be gone and the new ones they will install better be neat, bundled and color-coded...I want to change the face of Cebu. This is our chance,” matod pa sa mayor.