DUHA ka mga gituohang sakop sa New People's Army (NPA) ang nadakpan atol sa security patrol nga gihimo niadtong Miyerkules, Agusto 2, sa Barangay Kiburiao, Quezon, Bukidnon.
Nakadawat og report ang kapolisan sakop sa Bukidnon Provincial Public Safety Company ug kasundalohan nga adunay presensya sa mga armadong grupo sa dapit hinungdan milusad sila og security patrol.
Positibo ang report nga adunay presensya sa mga armadong grupo hinungdan nahitabo ang pagbinayloay og bala nga miabot og lima ka minuto.
Sa engkwentro, nadakpan ang duha ka magsuon sila si Roel Calolot, giingong nailang improvised explosive devices (IEDs)-making expert ug manghod niining si Ramil. Ang duha parehas gituohang sakop sa walhong grupo nga NPA.
Nakuha sa posisyon sa duha ang 57mm rocket launcher, tulo ka laptop, electrical wire, 24 ka mga IEDs, 51 rounds sa balas sa kalibre 30, lima ka blasting caps, uban pang IED paraphernalia, ug identification card ni Roel nga sakop sa Anakpawis.
Walay natalang kaswalidad sa parte sa gobyerno apan gidudahan nga anaa sa parte sa walhong grupo gumikan sa mga lama sa dugo.
Si Colonel Eric Vinoya, commander sa 403rd Brigade, miingon nga padayon sila sa paghatag og seguridad sa residente sa dapit aron malikay niining mga walhong grupo sa pagpangatake, pagpangilkil ug uban pang pagpanghasi nga mahitabo.