BOY SCOUT. Daghan ang nahingangha nga napili og usab si Bise Pres. Jejomar Binay nga presidente sa Boy Scouts of the Philippines (BSP) niadtong Sabadao, Hunyo 20, atol sa piliay sa National Exe­cutive Board (NEB) sa BSP.

Matod pa sa taho sa Rappler News, nga ika-19 ni nga tuig ang pagka presidente ni BP Binay sa BSP. Ang na­ngagi nga presidente pito ra ka tuig. Unsa kahay naa aning BSP nga di man biyaan sa among kakulay ni “Torni” Frank?

Morag nakahibawo na ko ngano. Ang BSP dunay sakop nga 2.2 milyones. Ingnon tang pung nga sa 2.2 milyunes nga miyembro dunay botante nga katunga sa usa ka milyon, naa na siyay segurado nga 50 porsiyento nga mosuporta.

Wa kunoy interesado nga modagan pagka presidente mao nga nasublian si BP Binay, matod pa. Motuo na lang ta aron way daghan estorya o lalis. Apan yuna pa, di ba na isyu man is Binay kabahin sa pagbaligya sa yuta BSP?

Gibisto ni sa kanhi Makati City Bise Mayor Ernesto Mercado nga alkanse ang pagbaligya sa lote sa BSP ngadto sa Alphaland tungod kay prime lot kini sa Makati city.

Ang balor sa lote P1 billion niadtong tuig 2008 sa pagpirmahanay sa kasabutan. Apan ang bahin sa BSP gikan sa Alphaland nga maoy nagtukod og condominium 15 porsiyento lang sa abangan.

Gani, tungod sa dakong pagkaalkanse apan dakong ginansiya sa Alphaland, nga giingon suod nga amigo ni BP Binay ang tag-iya ug gidudahan nga gigamit ni Binay ang kwarta niadtong piliay sa 2010 diin midaog siya batok ni DILG Sec. Mar Roxas.

Si BSP Senior Vice Pres. Wendel Avisado nga karon napiling secretary general sa BSP, bata-bata diay ni Binay sa Housing and Urban Development Coordinating Council (HUDCC). Matod sa taho nga si Avisado ang secretary general for administrative, finance, and knowledge management sa HUDCC.

Pagkadako sa posisyon ni Avisado sa HUDCC. Apan sa dihang miatubang siya ug kauban sa Senado niadtong Peb. 18, 2015 dihang giimbestigar ang kasabutan sa BSP ug Aphaland, miingon si Avisado, agig tubag sa pangutana ni Sen. Serge Osmena, nga wa silay financial adviser sa BSP.

“Lugi”, “lugi” (alkanse), pung pa sa mga senador mga mitambong ug miapil sa pagpangutana sa opisyales sa BSP nga gipangulohan ni Avisado niadtong Pebrero 18, 2015. Pagkadaghan man diay og kwarta sa BSP. Apan, asa?

Mao diay nga di ni sila si Avisado ug Binay magbuwag sa BSP ug HUDCC kay parehas man og “abilibad”. Mibiya na kuno sila sa tanan bisyo gawas sa pagpamakak.

Ang BSP usa na ka government-owned and controlled corporation (GOCC). Unya basi sa atong Batakang Balaod, ang bise presidente di makahupot og laing posisyon sa kagamahanan gawas pagka miyembro sa kabinite.

Sus di man gani mobiya o mopahawa pagka presidente sa BSP, unsa na kaha simbako og mapili nga presidente ning atong nasod sunod tuig. Susmaryosep! Kamo ang mohusgar unya ig-abot sa Mayo 2016.

****

GUBOT? Ang pagtudlo sa atong higala nga si Geronimo “Gerry” Sta. Ana, 75, nga ikalima nga komisyoner sa Energy Regulatory Commission (ERC), nakahimo kuno og kagubot sa ERC tungod kay gituhoan nga ang Aboitiz mao ang nagrekomendar kang Sta Ana.

Gani, ang taho sa Rappler News naghatag pagduda nga mao ni rason nga migawas si Energy Sec. Carlos Jerico “Ikot” Petilla sa Department of Energy gawas sa rason nga modagan siya pagka senador.

Ang inside story nagakana­yon nga dunay girekomendar si Petilla nga usa ka enhinyero ug dunay doctorate degree kabahin sa enerhiya. Apan nakurat na lang si Petilla dihang gitudlo si Sta. Ana agig bayad kuno sa utang kabubut-on sa mga Aboitiz. Ahem!

Matod pa, ang problema sa ERC commission kay ang naglingkod nga mga komisyoner way na kahibawo parte sa enerhiya. Unya duna say conflict of interest kay ang Aboitiz usa sa mga pinakadako power producer. (freezone.ellie588@gmail.com)