NAGSUGOD nag kisaw karon kon si kinsay bag-ong mangulo sa Philippine National Police (PNP) diin gikatakda nang moretiro sunod buwan si Deputy Director General Leonardo Espina nga maoy acting PNP chief human ni-resign si kanhi PNP Chief Alan Purisima.

Nitumaw ang pangalan nilang Deputy Director General Marcelo Garbo Jr., kanhing pangulo sa Police Regional Office (PRO) 7; Central Luzon Police Director Raul Petrasanta, Director Benjamin Magalong sa Criminal Investigation and Detection Group (CIDG), Director Ricardo Marquez ug Director Juanito Vano.

Si House Speaker Feliciano Belmonte, vice pre­sident sa Liberal Party nisuwat kang President Benigno Aquino nga nag-indosar kang Petrasanta apan gikataho nga si Garbo gipaluyohan ni Secretary Mar Roxas ubos niya ang PNP. Si Magalong gitumbok nga gipaluyohan usab ni kanhi Sen. Panfilo Lacson.

Apan, kini si Petrasanta nalakip sa gisuspenso sa Ombudsman uban si Purisima ug ang 17 ka mga opisyal sa PNP nunot sa imbestigasyon sa giingong pagbaligya sa 1,004 ka AK-47 rifles ngadto sa New People’s Army (NPA). Nahumana ang ilang suspensiyon niadtong Hunyo 4.

Anaa ra sa kamot ni Aquino ang pagtudlo sa sunod nga lider sa PNP. Kon buot niyang magpadayon nga magkahiusa ang liboang kapulisan sa tibuok nasod segurohon sa presidente nga haom ang tawo nga iyang mapili.

Sa samang higayon, ang lider nga iyang pilion adunay dignidad ug di makwestyon ang pagkatawo niini aron mahimo siyang modelo sa iyang liboang mga sakop.