ANIMAL rights group sa Sugbo nipasangil nga gatusan ka libod suroy nga mga iro ang gituyo og pamatay samtang nagsingabot ang international triathlon sa Sugbo, Cobra Energy Drink Ironman 70.3 Philippines.
Apan si Lapu-Lapu City Mayor Paz Radaza nanghimakak nga ang Siyudad nipatay og mga iro samtang nag-angat ang international triathlon.
Dunay ordinansa ang Siyudad nga naglatid nga ang iro nga madakop mahimong lukaton sa tag-iya samtang kadtong di, ilang ipasagop.
Ang Mayari Animal Rescue Organization Inc. (MARO) adunay Facebook post nga mipasangil nga gatusan ka libod suroy nga mga iro ang gipamatay tungod ug alang sa usa lang ka adlaw nga kalihokan.
Ang Maro nagbase sa dakbayan sa Sugbo.
Wa hinuon nganli ang hingtungdang dakbayan o opisyal, apan ang Lapu-Lapu City nagsilbing host city sa lumba sud na sa unom ka tuig.
"Ironman in the Philippines means killing hundreds of free roaming dogs, going about their daily lives, finding food to survive after being dumped in the streets by their retarted owners," matod sa Ludwiger Co. Animal Welfare Advocate, Animal Rescuer, nga gi-post sa Facebook page sa Maro.
Alang kanila, way angay ikapasigarbo sa nagmalampuson nga kalihokan sa Ironman kay luyo niini adunay mga nasakripisyo.
Si Arnel Limpangog, driver/catcher sa City Veterinary Office sa Lapu-Lapu, nagdumili sa pagkompirmar sa maong pasangil ilabi na nga wa siya sa posisyon sa pagluwat og pamahayag.
“Amo man nang trabaho (pagpanakop sa libod suroy nga mga iro), ma naay Ironman o wala,” matod ni Limpangog sa dihang nahinabi sa Superbalita Cebu.
Si Radaza nipasabot nga naay Ironman o wala, ang kampanya sa Siyudad sa pagsikop sa libud suroy nga mga iro nagpadayon.
Ila nga gipaneguro nga way iro nga makasuroy sa kadalanan atol sa Ironman kay kuyaw nga atleta madisgrasya.
"Kalain sab anang mopatay og gatusan ka iro. Wa mi ana," nagkanayon si Radaza sa interbyu sa Superbalita Cebu.