ATOL sa Father’s Day niadtong Dominggo, kapin sa 100 ka boluntaryo ang nakatigom og 10 ka mga dagkong bakat ug 130 ka sako sa basura gikan sa ilang nalimpiyohan nga 50-metros nga gitas-on sa Guadalupe River duol sa Guadalupe church dakbayan sa Sugbo.
“We spent Father’s Day cleaning Mother Earth,” matod ni Lt. James Reyes, civilian-military relations officer sa Navy Forces Central (NAVFORCEN).
Siya maoy gitahasan nga pagsilbi nga ground commander sa civilian core group nga nasakop sa Facebook group nga Maghisgot Kitag Politika, Bay (MKPB).
Gitawag kini og “Manglimpyo Kitag Suba, Bay” maoy sinugdanan sa malangkubon nga plano sa paglimpiyo sa Guadalupe River nga utlanan sa south ug north districts sa siyudad sa Sugbo.
Ang administrators sa MKPB mao sila si Emmanuel Mongaya ug tour guide Bino Guerrero nagkanayon nga ang pagpakabana sa kalikupan nga gipadayag online nahimong matuod uban sa ubang grupo. (PR)