ISIP usa ka responsableng haligi sa pa­milya Parawan, kanunayng busy sa pagpa­ngita og pangwartahan si Jaime, 50, aron lang adunay makaon ang iyang pamilya.

Si Parawan, nagdako sa naglutaw nga bahin sa Brgy. Looc, dakbayan sa Mandaue, ubos mismo sa unang Man­daue-Mactan Bridge.

Nagtubo siya nga pagpamasol ug pagpangisda, nga nahimo nila nga pa­nginabuhian.

Gawas niini, mamangkero u­­sab siya niadto sa mga kawani sa mga oil tanker sa maong lugar nga buot mokanaog sa ilang barko.

Nakahigayon og bisita ang Sun.Star Superbalita ni Tatay Jaime sud mismo sa iyang panimalay.

Ug didto iyang gisaysay ang iyang mapait nga kasinatian isip usa ka single nga amahan human siya gibiyaan sa iyang kapuyo.

“Nganung gibudhian man ko niya nga maayo man ko nga tawo?” pangutana ni Tatay Jaime.

Kini ang labing dako nga kahibung sa amahan sa tulo ka mga anak nga nagpanuigon og 6, 4 ug 2 anyos.

Katapusang nakit-an ni Tatay Jaime ang iyang kapuyo niadto pang Abril 11 sa dihang pahilom kini nga misibat sa ilang panimalay. Gisuwayan pa niya kini og gukod ilawom sa tulay apan wa na niya makit-i.

Dakong hagit karon ni Tatay Jaime ang pagbantay ug pagpadako sa iyang tulo ka mga anak.

Gikinahanglan nga padayon siyang mokayod alang sa iyang mga anak nga nagsalig kaniya.

Paambit ni Tatay Jaime sa Sun.Star Superbalita nga usahay dad- on nalang niya ang iyang mga anak kon siya mamasol tungod kay wa may makabantay niini.

Ang bugtong kuyog sa iyang mga bata kon siya mamasul o managat sa Mactan Channel mao ang ilang itom nga iro nga si Rum.

Sa panahon nga ma­ngangkat si Tatay Jaime og isda, di siya matunhay panahon nga kini iyang ibaligya tungod kay kanunay niyang su­sihon ang iyang mga chikiting sa ilang balay.

Kinsa bay magtuo nga sa matag higa­yon nga moad­to siya sa lawod aron mamasul aron adunay ika­pakaon sa iyang pamilya niadto, ang iyang kapuyo namasul usab og laing binuhat?

Gibudhian

Tungod sa pagpanarbaho niya duol sa mga barko, didto niya nahimamat ang iyang pares sa kinabuhi nga si Desyang (di tinuod niyang ngan) nga 18 anyos pa kaniadto.

Ang duha nahimong textmate usa pa nisud sa usa ka relasyon ug nag-ipon.

Nag-ipon ang duha sud sa pi­to ka tuig ug nagbunga ang ilang gugma og tulo ka mga bata.

Mga Enero ining tuiga, na­bantayan ni Tatay Jaime nga kanunay nalang magsige og lakaw si Desyang.

“Wa gyud ko magdahum kay wa man koy sala niya kay wa man nako sila pasagdi,” ni Tatay Jaime.

Padayon sa Kinabuhi

Matag adlaw, momata og mga alas 3 sa kaadlawon si Tatay Jaime aron mangangkat og isda.

Human siya makakuha og isda nga iyang ikabaligya, mouli siya sa ilang balay aron susihon ang nangatug pa niya nga mga anak.

Magluto na usab siya og pamahaw unyag abot niya.

Sa di pa siya molakaw sa balay aron ibaligya ang iyang mga isda, iyang tugnan ang iyang kamagwangan nga pabantayan ang duha ka mga manghod niini.

Inig balik ni Tatay Jaime sa ilang balay human sa iyang pagpanglibod og isda, iya dayong ihatod sa tunghaan si Beverly, ang kamaguwangan.

Human niya ihatod si Beverly sa tunghaan, mobalik siya sa ilang balay aron manglaba ug manglimpyo.

Sa giangkat nga isda ni Tatay Jaime, makaginansya siya og P10 matag kilo ug kini moigo ngadto sa P200 hangtod P300 nga ginansya, igo na aron aduna siyay ikapakaon sa iyang mga anak.

Ning tuiga, misalmot usab si Tatay Jaime sa sangka sa pamugsay sa dakbayan sa Mandaue diin siya maoy nahimong mananaog ug nakadawat siya og premyo nga P3,000.

Inspirasyon ug Paglaum

Anaa karon sa poder ni Tatay Jaime ang iyang mga bata tungod kay di siya gusto nga laing tawo ang ilhong amahan sa iyang mga anak.

Bisan lisod ang iyang kasinatian, apan padayon gihapon ang iyang pakig­bisog sa kinabuhi.

Sa dihang gipangutana ning mantalaan kon abli pa ang iyang kasingka­sing sa usa ka binuhat nga posibleng moabot sa iyang kinabuhi, gitataw ni Tatay Jaime nga iyang mga anak maoy prayoridad niya sa pagkakaron.

“Pa, pangitai mig Mama pa bi nga buotan di pareha ni Rose nga manyak,” hangyo ni Beverly sa iyang amahan matod ni Tay Jaime.