PORMAL na giabrihan ang ika-23 nga tuig sa pagpahigayon sa nationwide Shell National Active Chess Championships pinaagi sa una nga leg didto sa National Capital Region niadtong Sabado sa SM Mandaluyong.
Ang dula gikan lang sa kiddies under-14 ug sa juniors under-20. Pipila na ka kategoriya ang abri sa mga bata ug batan-on ug lahi pa gyud sa lalaki ug sa babae.
Sa unang higayon, matod sa press release sa Shell, “the Shell National Youth Active Chess Championship will now have a three-category competition.”
Abri na kini sa kiddies nga pito paingon sa 12 anyos (natawo sa 2003 paingon sa 2008) ug juniors nga 13 paingon 16 anyos (natawo sa 1999 paingon 2002). Ang ikatulo mao ang senior players gikan 17 paingon 20 anyos (1995 paingon 1998).
“We continue to discover new talents with the ever-growing number of players now taking up the sport, and because Shell believes in empowering the youth by giving them the opportunity to hone their skills,” batbat ni Shell social investment manager Jackie Ampil.
Nagpahibalo daan ang Shell nga “first-come-first-serve-basis” ang pagparehistro hilabi na sa Cagayan de Oro Leg nga ipahigayon karong Hulyo 18 ug 19 didto sa SM CDO.
Gawas sa NCR ug CDO, aduna sab kini leg sa Southern Luzon didto sa Batangas, Visayas didto sa Sugbu, ug sa Southern Mindanao didto sa Davao.
Mga qualifiers sa lalaki ug babaye sa matag kategoriya sa matag leg moabante sa grandfinals didto sa SM Megamall.
Gitaho nga adunay 48 nga grandfinalist nga modula karong Septyembre ug libre na tanan sa Shell Company ang mga plite, hotel ug uban pa.
Alang sa pagparehistro alang sa dari sa SM CDO, kontaka lang si Allan Cantonjos sa (0936) 996-7949.
Na-sanction kini nga torneyo sa National Chess Federation of the Philippines ug nasuportahan sa Shell FuelSave, Shell V-Power Nitro+, Shell Helix Oil Change Plus, Shell Citi Visa, Shell Pepeng Pasada, Shell FuelOil Plus, Shell Advance Ultra, Unilever ug SM Supermalls. (adunay taho ni Adel Domingo/PR Shell)