SULOD na ang Rain or Shine Elasto Painters sa top 4 human nila naangkon ang ilang ikaunom nga sunodsunod nga kadaogan.
Nalangkat sa Elasto Painters ang ilang kataposan nga tahas paagi sa 96-89 nga kadaogan batok sa Meralco Bolts atol sa 2015 PBA Governor’s Cup niadtong Dominggo sa SMART-Araneta Coliseum.
Nibira si import Wendell Mckines og 26 puntos, 12 rebounds ug tulo ka assist aron mangulo sa Elasto Painters, samtang nidugang sila Jeff Chan ug Paul Lee og 14 ug 12 puntos.
Dominante ang entrada sa Bolts sa una nga half diin nibinat kini og kinatas-an nga labaw nga 13 puntos, 30-17, apan nakabwelo kini ang RoS sa ikaduha nga half.
Nakontrolar sa Elasto ang dula pinaagi sa pagtimbayayong nila Beau Belga ug Chris Tiu sa ikatulo nga kwarter diin nakaangat pa og kinatas-an nila nga labaw nga 12 puntos sa kataposan nga kwarter, 94-82, ug naglisod na ang Bolts paggukod.
Sigurado na ang Elasto sa ikatulo nga pwesto nga adunay pito ka daog ug upat ka pilde bisan pa nga modaug ang GlobalPort Batang Pier, nga adunay unom ka daug ug upat ka pilde, batok sa nag-una nga Alaska Aces (8-2) sa ilang kataposan nga dula karong adlawa.
Kini kay napilde sa Elasto ang Batang Pier, 119-112, niadtong Mayo 21. Matagamtaman og twice-to-beat advantage ang makasulod sa top 4.
Gawas sa Aces ug Elasto Painters, naa sa ikaduha nga pwesto ang San Miguel Beermen nga adunay walo ka daug ug tulo ka pilde.
Nagbitay ang Bolts sa ikapito nga pwesto nga adunay lima ka daug ug lima sab ka pilde nga nagbugkos sa ikaunom ug ikapito nga pwesto uban sa Purefoods Hotshots, diin nidaug sila Barako Bull paagi sa 117-89 nga kadaogan bago ang dula sa Elasto Painters batok sa Bolts.
Apan kritikal pa ang sitwasyon sa Bolts sa posible nga mahimong four-way o triple tie pa lang sa paghuman sa elimination round sa pwestoanay sa top 8 crossover.