TALIWA sa kusganong pagsaway ug pagbatikos, nahimong malamboon gihapon ang Yulin festival niadtong Domingo sa China.

Nabantog na ang tradisyon sa Yulin pag-ihaw ug iro ug iring aron pagtimaan sa ting-init sa ilang lugar.

Dili illegal sa China ang pag-ihaw ug iro ug iring. Liboan ka mga tawo ang ningsaulog sa festival ug liboan usab ka mga iro ang gipang-ihaw aron somsoman sa mamistahay.

Sukad gihimo kining Yulin festival, walay puas sab ang mga animal activist sa bisan asang dapit sa kalibutan, labi na sa Estabos Unidos, pagpalanog sa ilang kusganong pagsupak.

Gani ang grupong Duo Duo Welfare Project nga nagbasi sa California nilusad og online petition batok sa Yulin festival. Dunay kapin na sa 250,000 nga ningpermi sa petition.

Dinhi sa atua, naa gihapon kining pagpang-ihaw og iro. Dili kaayo popular apan daghan sa atong palibot nga gusto mokunsumo og karne sa iro.

Dunay mga grupo sa Pilipinas nga supak pud aning matang sa kalihukan.

Apan, sama sa China ug ubang bahin sa nasod, wala gyud hingpit nga mapahunong sa gobiyerno kining pagpang-ihaw og iro.

Ang salikwaot lang niining nga grupo nga nagkampaniya batok sa pagpatay og mga iro mao nga samtang lig-on ilang baruganan pagprotihir sa mga hayop apan tak-om ilang baba bahin sa abortion o pagpakuha sa gisabak sa inahan.

Unsa may buot ipasabot nila, mas bilihon pa ang kinabuhi sa hayop kay sa tawo.

Unya, kumusta man kining mga kabaw, baka, baboy, manok, ug kanding? Minilyon kanila ang gipang-ihaw matag adlaw aron ipakaon sa mga tawo. Nganong wa may miprotesta.

Unsa may kalainan sa iro ug sa ubang klase sa hayop?

Dili ba kaha nga mas mangtas pa kon atong ihawon ang kabaw o baka kay dako baya na sila og papel sa pagpalambo sa umahan?

Dunay magsusulat nagkanayon nga kon kanunay ka mokaon og karne ang kinaiya sa mananap nga imong gikunsomo kanunay makita usab diha sa imong pagkatawo.