JAMPACKED ug makalingaw ang unang elimination round sa Bangga sa Sayaw 2015 Metro Davao Edition, Sabado, sa SIR Gym, Barangay Bucana ning dakbayan.

Unom ka mga dance groups ang nagtigi aron maka-abante sa semi-finals.

Matag grupo todo-bigay ug hataw nga mapakita ang ilang kamaayo sa pag-giling sa dance floor.

Ang unom ka grupong nagtigi mao ang NB Society, Last Element, Crossover, Obstacle, MKF ug TYGA.

Of course, di makumpleto ang kompetisyon kung wala ang mga huradong maoy migisa ug misala og maayo sa unom ka grupo.

Mga hurado mao sila Jilbert M. Abenoja nga usa ka dance choreographer ug artistic director sa pipila ka events dinhi sa siyudad, Davao Oriental ug ubang bahin sa nasud ug gawas sa nasud.

Anaa sab si Aris Dequit nga direktor ug choreographer sa Fusion, nga 2015 Hiphop International Megacrew Regional Champions ug top 10 lukop nasud; ug si Mark Jason C. Calvelo nga kanhi mananayaw sa GMa KUyaw Local Fiesta TV variety show dinhi.

Human sa showdown, gipili ang top 4 dance groups nga moabante sa semi finals nga himuon karong Hulyo 25.

Kini ang MKF, Crossover, Last Element ug TYGA.

Samtang karong Hunyo 27, himuon na sab ang ikaduhang hugna sa elimination sa Buhangin Gym.

Kinsa pa kadtong buot mosalmot, abtik ug dasdas na sa among buhatan aron makaparehistro.

Sa pagpalista, adto lamang sa Circulation Department sa Sun.Star Davao Office, Door 5 Ebro Pelayo Building Jacinto St. Davao City ug pangitaa lamang si Ramil Solamo.

Pwede sab siyang makontak sa numerong 0925-762-0200 ug 0910-269-8513.

Mga premyong ihatag sa grandiyosong grand finals karong Agosto 8,2015 mao ang mosunod: grand winner modawat og P15,000; first runner-up - P10,000; ug ang second runner-up - P5,000.

Ang kompetisyon sa nakalabay nga Sabado, gigiyahan sa DTI representative nga si Cleopatra L. Orendain.

Ang labing una nga Bangga sa Sayaw Metro Davao Edition nahimong posible uban ang tabang sa mga sponsors.

Kini ang Anflocor, 90.7 Love Radio ug New City Commercial Center isip major sponsors.