Mga kawani nga gitaktak mokiha sa kompaniya

MOPASAKA og reklamo nga union busting o kalapasan sa mga lagda sa pamuo ang 160 ka mga trabahante sa Cebu Nisico Corporation nga nawad-an og trabaho human manirado ang kompaniya niadtong Agusto 5, 2017.

Si Atty. Jonas Asis, regional vice president for the Visayas sa Associated Labor Union-Trade Union Congress of the Philippines, nibutyag nga iduso nila ang reklamo ngadto sa National Labor Relations Commission (NLRC) karong semanaha.

“This may take a process but we will make sure that the company and its officers in their personal capacity be held liable in the company,” pahayag ni Asis sa Superbalita Cebu.

Suma pa niini nga dili dawaton sa apektado nga mga mamumuo ang ihatag nga bayad sa CNC sanglit alang nila dili makiangayon ang gibuhat sa kompaniya ngadto kanila nga kalit lang silang gikuhaan og panginabuhian.

Sila nagduda nga tungod sa naumol nga union sa kompaniya ang tinuoray nga hinungdan sa pagpanira sa kompaniya ug dili ang kahimtang sa panalapi niini nga maoy gipalutaw.

Sa 160 ka mga trabahante, 80 niini ang mga sakop sa ALU-TUCP.

Si Cyril Ticao, officer-in-charge regional director sa Department of Labor and Employment 7, nipadala og tulo ka mga labor law compliance officer sa CNC sa miaging adlaw nga nahimutang sa Mactan Economic Zone sa Barangay Pusok, siyudad sa Lapu-Lapu, apan ang staff lang sa Human Resource Management Office ang ilang naabtan.

Matod niya nga base sa lagda sa pamuo kinahanglan ang notisya ihatag sa maapektuhan nga mga mamumuo 30 ka adlaw sa dili pa manira ang kompaniya.

“Para ‘yong workers makaha­nap ng ibang trabaho sa ibang company,” dugang ni Ticao sa interbyu sa Superbalita Cebu.

Ang ilang buhatan wa ma­kadawat og notisya gikan sa CNC nga nagpahibawo nga manirado na kini.

Ang CNC manufacturer og high-definition optical lenses.

Niadtong Sabado, nakugang na lang ang mga trabahante nga wala na sila pasudla ug patrabahoa sa kompaniya ug gipahibawo nga manirado na kini base sa notisya nga ilang nadawat nga pinetsahan og Agusto 5.

Ang notisya pirmado ni Jeoffrey Escala, human resource mana­ger sa CNC ug Takeshii Kobayashi, bise presidente sa kompaniya.

Si Ticao namulong nga base sa gipahibawo sa HR personnel bayaran sa kompaniya ang mga trabahante sa ilang sweldo hangtod sa Septiyembre 5 karong Agusto 16, apil ang ilang sick ug vacation leaves ug 13th month pay gikan sa Enero 1 hangtod sa Agusto 31, 2017.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph