MALALAG, Davao del Sur -- Bangi sa yuta mao'y gilantaw nga motibo sa kapulisan sa pagpatay sa Pangulo sa Liturhiya (PSL), alas 5:30 sa sayong kabuntagon, Dominggo.

Ang biktima nailhang si David Alfanta Panganduyon Jr., molupyo sa Purok Talisay, Barangay Poblacion.

Sa pakighinabi kang Police Officer 3 Jonaluo Cañada, imbestigador sa Malalag Police Station pinaagi sa selpon, siya nagkanayon nga nagsakay si Panganduyon sa iyang kolor puti ug itom nga Honda XRM, way plaka, samtang padung mosimba sa Sta. Teresita de Avilla Parish Church sa Purok Camanchiles sa lungsod.

Apan kalit nga nibutho ang wa mailhing mga mamumuno nga sakay og motor ug way daghang rason gipusil sa makadaghang higayon ang biktima.

Patay gilayon si Panganduyon human makaangkon og daghang samad pinusilan ang lawas.

Dali sab nga misibat ang mga mamumuno padung sa wa matinong direksiyon.

Nakarekober ang mirespondeng pulis og 11 ka mga basiyong bala sa M16 armalite rifle sa nahitaboan sa krimen.

Apan di pa matumbok sa kapulisan ang mga bansagon sa mga mamumuno tungod kay padayon pa ang ilang imbestigasyon. (OBD)