GIHIMAKAK ni Lapu-Lapu City Mayor Paz Radaza ang gi-practice sa city veterinary office ang euthanasia (mercy killing) ngadto sa gatusan ka mga iro nga na-impound sa maong buhatan nga gihimo sa dihang nagsingabot ang Ironman 70.3.
Samtang, gibarugan sa Mayari Animal Rescue Organization Inc. (MARO) nga wa na magkinahanglan og ebidensiya aron mapamatud-an ang matod pa mishandling sa gi-impound nga mga iro sa city veterinary sanglit sila mismo personal nga nakakita ug misusi sa impounding area.
“I don’t think so nga gi-mass killing (ang mga iro). Duna man gani gipabuhat nga (dugang) cage,” tipik sa pamahayag ni Radaza atol sa press conference.
Dugang pa sa mayor nga ang unclaimed dogs diha sa impounding area ilang ipa-adopt niadtong mga interesado nga mo-atiman og iro.
Ang Lapu-Lapu nagpadayon ang ilang pagpanakop sa mga libod suroy nga mga iro gawas sa ordinansa nga gipatuman sa siyudad subay sa nasudnong balaudnon, R.A. 9482 kon ‘Anti-Rabies Act of 2007’ nga ilang gisubay.
Si Joene Omega, media liaison officer sa MARO, niklaro nga ang ilang post sa ilang Facebook page wa magpasabot nga ilang gidauot ang local government unit (LGU). (FVQ)