GIBANA-BANA nga adunay kapin sa uno porsento sa mga rehistradong botante sa dakbayan sa Lapu-Lapu ang adunay problema sa ilang voter’s registration data sa Commission on Election (Comelec).

Si Lapu-Lapu City Election Officer Ann Janet Lamban niandam na sa iyang ‘Last and Final Notice’ nga tagsa-tagsa nga ipadala ngadto sa mga botante kansang registration records adunay kuwang.

Nasayran nga ang Lapu-Lapu adunay 163,000 ka mga rehistradong botante.

Matod pa sa opisyal nga gikinahanglan nga sa higayon nga madawat sa mga botante ang notisya gikinahanglan nga moduaw gilayon sa buhatan sa Comelec nga nahimutang sa ikaduhang andana sa City Hall building aron nga di maabtan sa deadline sa buwan sa Oktubre.

“Sa kadtong incomplete o way biometric data, auto­matic sila nga i-delete sa atong records,” pasabot ni Lamban dihang nahinabi sa Sun.Star Superbalita.