Mga gwardiya mireklamo sa ilang agency

KAPIN sa 70 ka mga gwardiya nireklamo batok sa ilang agency human wa sila pahibaw-a nga gibalhin na diay sila sa laing kompaniya.

Ang National Labor Re­­­­lations Commission (NLRC) mosuway paghilot sa isyu alang sa po­si­bleng settlement tali sa mga gwar­diya ug sa ilang employer.

Ang mga nireklamong gwardiya sakop sa Cebu Mandarin Security Agency.

Matod nila nga dugay rang nagplano ang kompa­niya pagpa-resign kanila ug pagbalhin sa ilang ser­bisyo sa laing security agency, nga mao ang A-Force.

Gipasaligan sila nga i­­­pa­dayon ra ang ilang length of service. Apan wa sila magdahom nga nahuman na diay ang tran­saksiyon nga wa lang gani magpahibawo kanila.

Gitug-an sa tigpamaba sa mga gwardiya nga si Bayani Fuentes nga nag-loan sa PAG-IBIG ang usa sa ilang mga kauban niadtong Marso ubos sa Cebu Mandarin Security Agency apan na-disapproved kini human nga lahi na diay ang kompaniya nga naghulog og kontribusyon alang niya.

Dugang niya, di na unta sila modangop sa NLRC kon natubag pa sa ilang kompaniya ang ilang mga pangutana labot sa estado sa ilang employment.

Bukas sila sa settlement tali sa ilang agency sa kondisyon nga mako­rehian ang nahisgutang isyu sa ilang panarbaho.

Ang NLRC pinaagi sa tigapamaba niini nga si Ma. Corazon Ensina, miingon nga taas pa ang proseso una hingpit nga masulbad ang bisan unsang matang sa reklamo labot sa pamuo.

Mas maayo hinuon kon makakab-ot og settlement ang duha ka habig apan kon di, mopahiga­yon na sila sa mandatory conference ingun man mo-require na usab sila pagpaduso og position paper gikan sa nalambigit nga kompaniya ug mga empleyado.