ANG pagpalambo sa sports tourism maoy usa sa mga gilantawan sa mga opisyal sa lungsod sa Alcantara, Sugbo.

Gumikan niini, ang mga opisyal sa maong lung­­sod nga gipangulo­han ni Mayor Beatriz Ca­burnay ug vice-mayor Fritz Lastimoso uban sa mga konsehales naghiusa sa pagpahigayon sa 1st Alcan­tara Fiesta Cup basketball inter-commercial league.

Ang torneyo sugdan karong Hulyo 11 diin mokabat ngadto sa P200,000 nga ganting salapi ang nakahan-ay a­­lang sa mga mananaog.

Sa niaging semana, ang mga opisyales nakig­hugpong sa mga team owners ug team representatives aron paghingpit na sa maong lega.

Ang mga team nga kompirmadong mosal­mot mao ang Abrenica Engineering, RMA Logistics, Aspa Scaffoldings, San Remegio squad ni Mayor Mariano Martinez ug MGM Sounds ni Lorega San Miguel councilor Glenn Mark Manal.

Posibling moapil usab ang SG Merchandizing a­­­pan nagkinahanglan pa og kompirmasyon sa team ow­ner kinsa atoa pa sa Estados Unidos nagbakasyon.

Ang makampyon ma­ka­bulsa sa P100,000 nga ganting salapi samtang ang runner-up adunay gahin nga P50,000.

Ang third ug fourth placers mouli usab nga may P30,000 ug P20,000 nga ganti. Kini gawas sa mga tagsatagsa ka mga tropeyo.

Gawas sa basketball, mopahigayon usab sila og professional boksing nga gikatakda karong Agusto 22.

“Aside from basketball, ato sab nga plano ang boxing. We have to be aggressive sa atong sports program,” matod ni vice mayo Lastimoso.

Si Rey Canoy maoy gitudlong commissioner sa maong torneyo.