GIKAN sa usa ka premyadong basketball venue sa Sugbo, ang Cebu Coliseum giu­wan na’g mga bugalbugal human kini nakasinati og mga kakulian atol sa mga tor­neyo nga gipahigayon ning maong edipisyo.

Lakip na niini ang teknikal nga mga problema nga nahitabo sa Cebu Schools Athletic Foundation Inc. (Cesafi) finals ug ang ubos og kalidad nga sawog sa korte niini.

Apan bisan pa ning tanan, ang Sugbo wala’y laing kapilian.

Kini maoy hinungdan nga nakadesis­yon ang Cebu Coliseum management nga mopahigayon og mayorihiyang pag-ayo sa venue dili pa magsugod ang Cesafi 2015 season karong Agusto 1.

Sa bag-ong season sa Cesafi, gilauman nga ang mga magduduwa maka­dagan na og sawog nga bag-ong giayo.

Gibutyag ni Cebu Coliseum Complex in-charge Susan Bacalso sa Sun.Star Cebu nga gipang-anay ug nangadugta na ang sawog sa coliseum ug kinahanglan na gyud kining bag-uhon.

Ang pag-ayo gisugdan niadtong Hunyo, pipila ka mga adlaw human napahigayunan og duha ka mga buwan nga basketball summer clinic ang coliseum.

Gipasabot ni Bacalso nga gipaspa­san nila ang pag-ayo sa coliseum alang sa pagsugod sa Cesafi.

Gawas sa sawog, nagkinahanglan bag-uhon sab ang fiber glass board ug ang ring.

“Kay naputol man gud ang ring. Ang goal post mao ra gihapon, ilisan lang gyud ang board ug ang ring,” matod ni Bacalso.

Kinahanglan sab ayuhon ang lighting system, digital scoreboard ug uban pa.

Dugay nang girekomendar ni Cebu Coliseum manager Ben Tulda nga ayuhon ang venue apan karon lang kini nahimong posible.

Kaniadto, magmatinel lang ang management sa pagtapak sa mga guba sa venue.