KARON nga mialisngaw na ang tensyon tali ni Dwyane Wade ug sa Miami Heat, nasulod na sa senaryo ang Los Angeles Lakers.
Ang Lakers tatawng nangita og lig-ong katambayayong sa ilang edaran nga superstar nga si Kobe Bryant ug haom kaayo si Wade sa ilang gipangita.
Si Wade usa sa labing giatngan karon sa free agency unya ningkatap na nga dili maayo ang relasyon niini sa Heat.
Gani sa sayo pa, gikataho nga ang amahan ni Wade nasigpatan nga nagsul-ob og Clevelang Cavaliers jersey hinungdan nga migawas sab ang hugonhugon nga posible siyang moapas sa iyang higala nga si LeBron James.
Ang Lakers ug Cavaliers duha pa lang sa gilaumang mangulitawo ni Wade inig abli sa free agency.
Kon kinsa man gani ang makakuha kaniya, si Wade mahimong mopirma una og usa ka tuig nga kontrata mintras tanto dayon mangita siya og long-term deal inig human niini.
Gikataho nga ang gitanyag ra sa Miami kang Wade sa usa ka long-term deal nagbalor lang og $10 million matag tuig ug wala nagkasinabot ang duha ka mga kampo niini.
Si Wade mag-edad na og 34 karong Enero apan usa lang gihapon kini sa labing gikahadlukang shooting guards sa National Basketball Association (NBA).
Nag-average siya og 21.5 puntos ug 4.8 assists sa miaging season sulod sa 62 ka mga duwa.
Kon magkauban sila si Wade ug Bryant sa Lakers, nalantawan nga mahibalik ang kalig-on sa Lakers.
Ang Lakers ninghuman sa miaging season nga ikaupat sa labing ubos og standing gumikan kay wala si Bryant.
Sa sunod nga season, makabalik na’g duwa si Bryant. (AP)