GIPABUHAGAY og balik ni Golden State Warriors general manager Bob Myers nga prayoridad sa team nga magpabilin sa ilang tugkaran si Draymond Green, kinsa nakatabang og dako aron maangkon ang labing una nilang titulo sa National Basketball Association (NBA) sulod sa 40 ka mga tuig.
Gipasabot ni Myers nga tinguha nilang magpabiling solido ang kinauyokan sa ilang puwersa aron unahon nila paghatag og atensyon ang sitwasyon ni Green, kinsa mahimo na unyang restricted free agent.
“Our hope is to keep the core together. That is within our control,” matod ni Myers.
“Clearly, with the success we’ve had this season, the players have shown this group can win. High character. A lot of youth. They’ve been able to complement each other.”
Apan gituohan nga seguradong mawagtang sa balwarte sa Warriors ang kanhi All-Star nga si David Lee, kinsa nadawat og dakong suweldo apan wala na kaayo magamit gumikan sa maayong gipakita ni Green. (AP)