MAGPADAYON ang rotational brownout nga gipatuman sa Visayan Electric Company sa mga lugar sa Sugbo nga ubos sa prangkisa niini gumikan sa kakuwang sa supply sa kuryente sa Kabisay-an.
Kagahapon, giisa ang red alert status sa National Grid Corporation of the Philippines (NGCP) human wa mag-andar ang pipila ka geothermal plants sa Leyte nga apektado sa kusog nga linog sa miaging buwan.
Tungod niini, nasinati na usab ang usa ka oras hangtod sa usa ka oras ug tunga nga brownout sa mga barangay sa upat ka mga siyudad ug upat ka mga lungsod sa Sugbo, sugod ala 1 sa hapon hangtod sa alas 10 kagabii.
Apil sa mga apektado ang mga dakbayan sa Sugbo, Mandaue, Talisay ug Naga ingon man sa mga lungsod sa Minglanilla, Consolacion, San Fernando ug Liloan.
Sa advisory sa NGCP kagahapon, niabot og 1,903 megawatts ang peak demand sa Visayas grid apan, 1,847 MW lang ang available nga kapasidad sa kuryente sa hapon.
Samtang kagabii, niabot og 1,843 MW ang peak demand apan, 1,722 MW ang kapasidad sa kuryente.
Sa maong supply, 36.1 MW ang iya sa Veco, matod ni Quennie Bronce, Reputation Enhancement Manager sa Veco.
Si Anton Mari Perdices, chief operating officer sa Veco, namahayag nga hangtod dili maayo ang mga power plant sa Leyte nga naguba sa kusog nga linog, magpadayon ang rotational brownout.
Matod niya sa katapusan ning buwana gibanabana sa NGCP nga maayo ang 350 kilovolts switching line gikan sa Luzon hangtod sa Visayas.
Si Perdices nipasalig sa publiko nga hangtod sa duha ka oras lang ang labing dugay nga rotational brownout nga masinati. (SCG)