ABI niya og bronse o mahalong butang ang gilubong sa yuta, apan nakurat ang usa ka menor de edad nga nisunod sa pagkawot nga usa kini ka puya.
Sumala sa pasiunang inpormasyon nga nahipos sa Homicide Section sa Lapu-Lapu City Police Office (LLCPO), ang patay nga puya napalgan sa ala 1:30 sa hapon niadtong Dominggo sa bakanteng luna sa Basak Mercado, Sudtunggan Road, Barangay Basak.
Gibanabana nga anaa pa sa pito ngadto sa walo ka buwan ang puya nga usa ka lalake nga nakawtan sa usa ka menor de edad.
Usa ka Giemar Briones nga molopyo sa dapit ang nakamatikod nga niadtong Sabado sa gabii, usa ka wa mailhing lalake uban sa usa ka bata ang dunay gilubong sa nahisgotang lugar.
Namatikdan ni Briones, nanguros ang lalake human sa ilang paglubong sa usa ka butang diha sa yuta sa wa pa kini mobiya luwan sa motorsiklo.
Ang napalgang puya ang gidala sa Catholic cemetery aron kahatagan og desenteng lubong.