KAWALAY klaro diay niadtong panahon ni kanhi mayor Mike Rama diha sa Cebu City Hall. Lalim bay wa diay kontrata ang gikuhang architect alang sa Cebu City Medical Center (CCMC)?
Karon, importante man ang kontrata aron kining architect mabayran. Pagkadako ra ba sa ilang kolektahunon. Moabot og P33.3 milyones.
Nalangay sab ang pagsugod sa pagtukod sa ospital kay wala say building permit.
Ambot kon duna bay alibyo kining maong kahimtang sama sa paghimo og kontrata karon na. Di ba sab makuwestyon ang mga opisyal karon?
Ang ako lang, kay nganong nilusot man kaniadto bisan og way kontrata?
Ang nakapaet pa gyud kay maypagka nyutral ra ba diay kining maong architect sa politika sa Syudad sa Sugbo.
Gani, akong nahibaw-an gikan sa usa ka tinubdan nga suportado sa maong architect ang Bus Rapid Transit (BRT). Ilang nakita nga maka-alibyo sa kahuot sa trapiko sa Syudad sa Sugbo ang BRT.
BRT
Basi sa mga mabasa nato sa social media, wa pa man gyud diay moundang ang kampo ni Presidential Assistant for the Visayas (PAV) Mike Dino sa ilang tinguha nga mababagan ang BRT.
Usa ka Facebook post sa account sa iyang opisina niinsiter adtong iyang hulagway sa huot nga trapiko sa dalan Escario ug igo lang niyang gikoloran sa tunga.
Matod niya, nga kon ang mga bus maoy magbahas-bahas sa mga tunga nga lane, mosamot kahuot ang kadalanan.
Wa niya gipapas sa maong hulagway ang mga PUJ nga maoy nagdala sa kahuot. Di na man paagion sa mga ruta sa BRT ang mga PUJ. Buot ipasabot, ang mga tigsakayan sa mga PUJ anha na sa mga bus mosakay.
Nya, kay paspas man ang BRT, bisan unya mga tag-iya og mga awto anha na lang mosakay sa BRT.
Apan yuna pa, duna lang koy mga pangutana kang PAV Dino.
1. Trabaho diay sa usa ka presidential assistant sa pagbabag og mga proyekto nga naapruban na ni Presidente Duterte? Di ba iyang trabaho mao ang pag-facilitate sa mga proyekto ug dili pagpangaway og mayor?
2. Wa ba makaamgo ang Dino nga kulang ang preparasyon sa iyang staff kabahin sa ilang kampanya?
3. Wa ba magpakabana si Dino nga kining iyang pagbabag sa BRT, kon molampos man, moresulta sa dakong utang ug kaulawan sa adminitrasyon ni Presidente Duterte?
Kon kumbinsido man si Dino nga palpak ang BRT, unya na siya unta mopagarpar niini inig hapit na ang piliay sa 2019. Total, molansar man siya.
Maayo na lang kay nausab ang hunahuna ni Neda chairman Ernesto Pernia ug niduso sa pagdugang sa pundo alang sa BRT gikan sa P10 bilyones ngadto sa P16 bilyones.
Bisan pa man, nagtuo ko nga maninguha gihapon kini si Dino nga iyang mausab ang hunahuna ni Presidente Duterte.
Mao nga kinahanglang ipakita gyud sa mga taga Cebu nga kita na mismo ang wala makauyon niining gibuhat niining usa lang ka assistant.
(@anol_cebu sa Twitter)