HUGOT nga giobserbahan sa Department of Agriculture (Da) sa Central Visayas ug ubang hingtungdan ahensiya sa kagamhanan ang migratory birds nga ningdagsa sa Isla sa Olango, dakbayan sa Lapu-Lapu.
Si DA 7 Regional Executive Director Salvador Diputado niingon ang mga migratory bird ang gidudahan nga hinungdan sa outbreak sa mga kaso sa bird flu sa lalawigan sa Pampanga.
“Dapat ato pud na obserbahan (Olango Island), ato pud tan-awon kon ma ba gyud ni hinungdan,” pahayag ni Diputado sa mga tigbalita atol sa selebrasyon sa adlaw sa mga mag-uuma sa Kapitolyo kagahapon.
Sa ilang nadawat nga kamandoan gikan ni Dr. Enrico Garzon, Agriculture Assistant Secretary for livestock, kini nagdili sa pagpabiyahe sa mga manok ug ubang livestock products gikan sa Luzon paingon sa Kabisay-an ug Mindanao.
Si Diputado nihangyo sa publiko nga kon dunay makit-an nga talagsaon nga kamatayon sa mga manok, itik ug pugo i-report dayon sa hingtungdan nga mga ahensiya sa gobiyerno aron maimbestigar.
“Kay kon dunay unusual nga kamatayon basin kon usa nana siya ka kaso og bird flu. Mao nang duna pud tay responsibilidad mga katawhan,” pamulong niini.
Siya nipasidaan sakmiton ang livestock nga palusot sa Visayas ug impound ang mga produkto. (SCG)