GIHAWOD sa Gigi Go Team ang 1st Iligan City Mayor Celso G. Regencia Cup Summer Special Tatluhan Chess Tournament niadtong Domingo didto sa Pala-o, Iligan City.
Nikampyon ang Gigi Go, gikomposar nila James Frias, Silverio Abasolo ug Arbz Calido, agi sa hingpit nga labaw sa tie-break points human mag-abot sa three-way tie uban sa Stalag 69 ug MD Wil.
Parehas nahuman ang Gigi Go, Stalag ug MD Wil nga adunay 11 puntos matag usa paghuman sa kataposang pito ka round.
Nag-una na daan ang Gigi Go og full-point lead sa penultimate sixth round, apan napugngan sa Stalag.
Gipilde sa Stalag ang Gigi Go, 2-1, sa kataposang round aron magkumboya sa una paingon sa ika-tulo nga pwesto.
Bisan sa kapildehan sa kataposang round, nibida si Abasolo sa Gigi Go diin gilikay niya ang iyang team nga ma-zero.
Iyang daug kang Ronald Canino maoy susi sa kadaogan aron molamang og tunga sap unto nga labaw sa tie-break kontra sa hingpit nga nagsunod nga ang Stalag.
Niangkon ang Gigi Go og 15.5 puntos sa tie-break, samtang ang Stalag adunay 15 aron molanding sa ikaduha. Ang MD Wil naa sa ika-tulo nga adunay 14 tie-break points.
“Katong daug ni Abasolo maoy nagpakampyon sa Gigi Go ug trilling pa gyud nga pagdaug,” ingon iyang teammate nga si Calido.
Niuli ang Gigi Go og P12,000 nga cash prize ug trophy, samtang ang Stalag ug MD Wil niangkon sa P7,000 ug P5,000 cash prizes ug trophies matag usa.