IABOT sa 150 ka professional boxers sa Pilipinas ang gipang-ban gumikan sa pagpalsipika niini og resulta sa brain scan aron makaaway.
Ang gobiyerno sa nasod nagpatuman na og estriktong medical testing procedures gumikan sa kamatayon sa pipila ka Pinoyng mga boksidor sa minglabayang katuigan.
“The welfare and safety of our boxers is part of our mandate. We do not want any more boxing deaths,” pasabot ni Games and Amusements Board chairman Abraham Kahlil Mitra nga napatik sa GMA News.TV.
Nasuta sa GAB nga ang 150 ka mga boksidor nagsumiter og “peke” nga resulta sa CT scan karong tuiga. Lakip sa mga rason niini mao ang kataas sa bayad sa CT scan.
Nagpahigayon sab og imbestigasyon ang GAB sa laing mga personalidad nga adunay kalambigitan sa gipang-ban nga mga boksidor.
Niadtong 2012, ang wala’y pildeng si Karlo Maquinto, 21, nakuyapan human sa iyang away ug namatay kini gumikan sa brain injury. Mao pa lang kini ang ikasiyam nga away ni Maquinto.
Laing duha ka Pinoyng mga boksidor ang nangamatay niadtong 2005 ug 2008 gumikan sa samang rason.
Nagkanayon si Viernes nga aduna sa’y laing lima ka mga boksidor nga wala na nila hatagi og bag-ong lisensya gumikan sa brain injuries nga nasinati niini.
Ang Pilipinas naila sa boksing hilabi na dihang misikay og maayo si Manny Pacquiao, kinsa mikampiyon sa walo ka managlahing weight divisions.
Gawas kang Pacquiao, aduna pa'y daghang mga boksidor ang nakahatag og dungog sa Pilipinas sukad pa kaniadto hangtod karon.
“We’ve been criticized for being too strict but still that’s our job and we maintain it that way,” pasabot ni Viernes.
Nagkanayon si Health Secretary Paulyn nga sa umaabot, ang mga ospital motanyag og libreng medical tests sa Pinoyng mga boksidor. (AFP, ESL)