"I-AMPO ang malinawon nga pagsaulog sa 32nd Kadayawan Festival di lamang kalinaw sa Davao City kun di sa tibuok Mindanao."
Kini ang gisulti ni Davao City Mayor Sara Duterte-Carpio atol sa Opening Ceremony sa Kadayawan sa Dabaw didto sa Ramon Magsaysay Park, Lunes sa gabii, Agosto 14.
Nagpasalamat sab ang mayor sa onse ka tribu sa Davao City nga maoy hinungdan nga dunay kaugdahan sa Kadayawan nga trayntay dos na ka tuig karon.
Dugang sa mayor nga luyo sa pagsadya, di suma pa kalimtan ang pag-ampo sa mga lugar ug sa mga nabiktima sa giyera sa Mindanao.
“Let us not forget despite the celebration that we have here in Davao City, during the month of August, let us not forget that we have fellow Mindanaoans who are within challenging times right now. Dili ta makalimot sa ilang mga kaagi, magpadayon ang atong pag-ampo na mahiusa na ug maging malinawon na ang ilahang nagkadaiyang lugar sa atong mga kaigsuonan dinhi sa Mindanao, we are one with you because we are one nation," tipik sa pamulong sa mayor.
Gipasalamatan sab sa mayor ang pribadong sektor nga gipangunahan ni Kadayawan Vice Chairperson Ronald Go, mga local government offices diha sa ilang mga heads, ug ang mga national government agencies.
Ingon man ang pasalamat sa mayor ngadto sa mga deputy mayors sa onse ka tribu gimikan sa ilang dakong papel sa pagdasig sa ilang mga kaigsuonan sa tribu nga mohatag og partisipasyon sa gikonsiderang programa alang kanila ug sa tanang taga Davao City.
"The most important of all is our thanks to our eleven tribes led by the deputy mayors, because if not for your participation, the celebration of Kadayawan will not be possible. Because of you we have celebration of thanksgiving in the city of Davao," dugang sa mayor.
Giingon sab sa mayor nga ang tema nga "Stand tall, Strong, United, and Resilient” mao untay mamahimong tulay aron mas madasig pa ang Dabawenyo diha sa kinabuhi luyo sa mga unos sa kapalaran.
"Despite the challenges, ang atong kinabuhi ug ang atong siyudad (our life and our city) and our daily lives must go on. And our city must soar high like the Philippine eagle," butyag niya.
Adlaw'ng Lunes, opisyal nga giablihan ang 32nd Kadayawan Festival pinaagi sa pagdukdok sa "gong" ni Mayor Sara atubangan sa daghang mga Dabawenyo nga misaksi niini.
Naa sab sa seremonya ang mga miyembro sa Kadayawan Executive Committee nga gipangunahan ni Captain Ronald Go, DCCCII President ug Kadayawan Execom private sector co-chairperson, Gatchi Gatchalian- Kadayawan sa Davao Festival Director ug Kadayawan Spokesperson ingon man si City Tourism Operations’ Office Office-in-Charge Generose Tecson.
Opisyal sab nga giablihan ang Kadayawan Tribal Village diin makita ang onse ka mga balay sa onse ka mga tribu nga nagpakita sa ilang mga kultura, gigikanan ug kinaadman.
Ang Cultural Show sa Magsaysay Park magpabilin hangtud Agosto 20. (Jeepy P. Compio)